Qinersisartunit nalilerneqarnissani Gerhardt Petersenip siunniuppaa
Erling Madsenip Iloqqortoormiuni Atassutip peqatigiiffiani siulittaasup nuna tamakkerlugu Atassutip siulittaasua Gerhardt Petersen immikkut ittumik ataatsimeersuartitsinissaanik kajumissaarpaa.
Kisianni Gerhardt Petersenip qinigaaffik naallugu Atassummi siulittaasuunissani pilersaarutigaa. Qinigaaffik naallugu sulereeruni qinersisartut qanoq partiimik siuttuulluartiginera nalilersinnaajumaarmassuk.
- Siulersuisut 2009-mi aggustip aallartittut aallaqqaammut ajornartorsiuteqartaraluarlutik maanna politikkimi suliamik tunngavii oqaloqatigiissutigisaramikkit pitsaanerusumik ingerlariaaseqalersimallutik, Gerhardt Petersen oqarpoq.
Jakob Janussenip Atassutip siulersuisuisa sulineranni Atassummi ilaasortat nungukkiartornerat uparuarpaa, tamanna Gerhardt Petersenip siulittaasutut tunuarnissaminut pissutissaasorinngilaa.
- Tunniutiinnarnianngilanga, nuna tamakkerlugu siulittaasutut taamani qineqqusaarnitsinni qinersisut affaat sinnerlugit qinersisigaakka, inuit tallimat siulittaasutut qinigassanngortillutik sassaraluartut, Gerhardt Petersen oqarpoq.
Atassummi aaqqissuussaanikkut siulittaasup tulliata Hans Lyberthip Radioaviisimut allakkamini oqaatigaa, siulittaasup qanoq suleriaqqinnissani eqqarsaatigilluartariaqaleraa.
- Inatsisartut upernaakkut ataatsimiinnissaanni Atassummit Inatsisartuni ilaasortat inatsisissatut siunnersuutaat tamarmik akuerineqanngimmata, Atassummi siulittaasup Gerhardt Petersenip akisussaaffik tigunagu siulersuisut tamaasa pisuutimmagit nuanninngilaq.
Aamma innuttaasut eqqarsaatigisariaqarpagut avammut Atassutip saqqummertarnera eqqarsaatigissagutsigu, Hans Lyberth oqarpoq.
Atassummi siulittaasup sulinera naammaginartippiuk?
- Pisut kingulliit eqqarsaatigissagaanni siulittaasup uatsinnut akisussaaffimmik tunniussinera aamma akisussaassuseqanngitsutut sulisimanitsinnik oqariartuuteqarmat naammaginartinngilara, Hans Lyberth oqarpoq.
Gerhardt Petersenip Atassummi siulittaasutut sulinerminik Hans Lyberthip naammaginartitsinani Radioaviisimut allataa takorusunnerarpaa, oqaatigaalu Hans Lyberth ippassaq ataatsimeeqatigigamiuk siulersuisuni siulittaasutut suleriaatsiminik uparuaasimanngitsoq.
