Qinersisartunik malinnaasoq: Qarasaasiatigut qinersineq akimmiffeqarsinnaasoq

Qinersisartut qarasaasiatigut qinersisalissappata tamanna akimmiffeqarsinnaasoq, qarasaasiatigut qinersinermi immikkut ilisimasalik naliliivoq.
Qinersisartut namminneerlutik kiffaanngissuseqarnerulernissaannik Naalakkersuisut periarfissikkusukkaat:(Assi: toqqorsivimmit)
januaarip 09-at 2020 12:20

Innuttaasut inatsisartunut qinersileraangamik siunissami angerlarsimaffimmiit qarasaasiaq atorlugu qinersisinnaalissapput. Siunnersuummi tusarniaavigineqareerpat inatsiartunillu akuerineqarpat atuutilertussaassaaq.

Qinersiniarnerullu isertuunnissaanut qulakkeerinninniarneq danskit qinerseriaasiannit allaanerulissaaq, naak qarasaasiartigut qinersisarnerup danskit aaqqissugaat ilaarlugu ilusilersorneqaraluartoq.

Qinersinerup nalaani qinisusssap akisussaaffigissavaa kisimiilluni allamilluunnit isigineqarluni qinersissanerluni.

Inatsimmi tunngaviusumi allaqqavoq §31, stk. 1
  •  Folketingemut naliginnaasumik, toqqaannartumik isertuussamillu qinersisoqartarpoq. 

Tusarfik: Danmarks Riges Grundlov

AAMMA ATUARUK Naalakkersuisut qarasaasiatigut qinersisinnaalersitsiniartut

Tamannali qulakkeeruminaatsoq, Danmarkimi IT-mut ilisimatusarfimmi professori, ilisimatusartunullu pisortaq Carsten Schürmann, taama naliliivoq. Taanna siusinnerusukkut qarasaasiatigut qinerseriaatsinik malinnaalluni ilisimatusarnikuuvoq.

- Qinersisartut qarasaasiatigut qinersinerisa nalaanni sumiinnersut kisimiinnersulluunniit qulakkeeruminaattarpoq. Angerlasimasinnaapput ikioqqullutilluunniit, taanna oqarpoq.

Qarasaasiatigut qinersisinnaanngornerup qinerseriaatsimut pissutsinut inatsisitigut allanngortitsissanngilaq. Tassami pappiliat aqerluusallu qinersivimmukarluni periarfissaajuaannassaaq.

Qinersisartut aallaaviussapput

Qinersineq isertuussamik ingerlanneqarnersoq qulakkeeruminaattarpoq ineeqqami kisimiilluni qinersineq pinngikkaangat. Assersuutigalugu qinersivimmi saagut tunuanni qinersineq ingerlanneqartoq, tassami tamat oqartussaaqataanermut attuumassuteqarpoq, professori oqarpoq.

Norgemi Sverigemilu allatut qinerseriaaseqarput:
  • Danmarkimi Islandimilu qinersineq nakkutigineqarluni qinersivimmi ingerlanneqartarpoq. Angerlarsimaffimmi qinersisoqarsinnaanngilaq. 
  • Nunanilu avannarlerni inatsisit ilaanni allaqqavoq, inatsisartunut ilaasortat isertuussillutik qinersisassasut. Kisianni Norgemi, Sverigemi Finlandimilu qinersinermut allattorsimaffiit angerlarsimaffiliaanneqarsinnaapput angerlarsimaffimmilu immersoriarlugit uterteqqinneqarsinnaallutik.
  • Nunani avannarlerni qinerseriaatsit Naalakkersuisut malissallugit ammaffigaat, allaanerussutigissavaali qarasaasiatigut qinersineq ingerlanneqartassammat. Tassa nakkutigineqarani qinersisoqarsinnaalissaaq.

Tusarfik: Qinersisarnermut inatsimmut allannguutissatut siunnersuut

- Isertuussamik qinersinissaq pingaaruteqarpoq, tassami qinersisartut isumaat aallaavigalugu naalagaaffiup siuttussaa aalajangerneqartarpoq, taanna oqarpoq.

Periarfissaq nutaaq atulerpat qinersisartut kisimiillutik qinersisarnerata qulakkeerneqarsinnaajunnaarnissaa allannguutaassaaq, qinersinerit arlallit pisinnaapput, kingullermeerlunilu qinersimasaq qinikkatut nalunaarsorneqassalluni.

Kinaassutsip isertuunnissaa ajornakusoortoq

Qarasaasiat aqqutigalugu qinersisoqartillugu qinersisup kinaassusaa qulakkeernissaa aamma eqqumaffigineqartussaavoq. NemId aqqutigalugu tamanna qulakkeerneqartassaaq.

Taamaaliornikkut sillimaniarneq qulakkeerniarneqaraluartoq qinersisulli kinaassusaata isertuunneqarsinnaanissaa ajornakusuulissaaq.

- NemId atorlugu qarasaasiamut iseruit, qarasaasiap kinaassutsit paasissavaa. Partiilu arlaat qinerukku qarasaasiap aamma nalussanngilaa kikkut qinerneritit, Carsten Schürmann oqarpoq.

Qarasaasiakkut qinersisarnerup atuutsinniarneqarnerani qarasaasiap nalunaarsuisarnera ukkatarineqassaaq.

Qinersisimaneq qinersinermilu kinaassutsip isertuunnerata qulakkeerneqarnissaa suli misissorneqartoq professorip oqaatigaa.

Qinersisarnermut inatsimmut allannguutissatut siunnersuutip erngertumik atuutilernissaa Naalakkersuisut siunertaraat.