Naalakkersuisut qarasaasiatigut qinersisinnaalersitsiniartut
Aqerluusaq pappiararlu innuttaasut Inatsisartunut qinersineranni qitiusumik atorneqartartuugaluarput. Tamanna allanngungajalersinnaavoq.
Naalakkersuisut aalajangiisussaagunik innuttaasut qarasaasiatigut qinersisinnaalissapput.Tamanna inatsisissatut siunnersuummi tusarniaassutigineqartumi atuarneqarsinnaavoq.
* Qinersineq nalinginnaasoq. Qinersivimmut nammineq takkulluni.
* Sioqqutsisumik taasineq. Allakkatigut taasinermik siusinnerusumik taaneqartarsimasoq assersuutigalugu kommunini pisarpoq.
* Qarasaasiakkut allakkatigut taasineq. Qarasaasiakkut internetti atorlugu taasinissamut periarfissaq.
Tigusiffik: Qinersisarnermut inatsimmut allannguutissatut siunnersuut
Siunnersuutip akuerineqarnissaa Naalakkersuisunit iluatsinneqassaguni qinersisartut angerlarsimaffimminnik qarasaasiaq NemID-lu atorlugit 2022-mi qinersisinnaassapput.
Kilisaatersortunut periarfissaasoq
Inatsisissatut siunnersuut naapertorlugu qarasaasiatigut qinersisarneq taarsiissutaavissanngilaq. Qinersisarnermili ileqquusumut tapertatut periarfissaassalluni.
Qangatut aqerluusaq pappiararlu atorlugit qinersisarfinni qinersinissaq nunatsinniinngitsunullu qinersinissamut periarfissat periarfissaaginnassapput.
Inatsisissatut siunnersuummi kilisaatini inuttat qinersiviup nalaani angalasut qarasaasiatigut qinersisalernermik iluaqutissinneqarsinnaanerat erseqqissaatigineqarpoq.
Tamatuma saniatigut ilinniartunut nunatsinniinngitsunut qinersinissap angumeriniarnera kiisalu qinersinerup qinersivimmut piffissaq qaangiutsinnagu anngutissanerata isumannaarniarnera ajornakusoorsinnaasoq Naalakkersuisut erseqqissaatigaat.
Qinersisartut isertortumik qinersinissamut akisussaassuseqarnerulissasut
Inatsisissatut siunnersuut nutaaq Danmarkimit ilaarneqarsimasumit tassalu avatangiisini nakkutigisaasuni qinersinermik taaneqartartumit aamma allaanerussaaq.
Naalakkersuisut qinerseriaaseq Finlandimi, Norgemi Sverigemilu atorneqartoq ammaanniarpaat, tassa innuttaasut qinersinerup ingerlaneranik isertortuutitsinissamut aamma akisussaassuseqartinneqarnerat.
- Takuneqarsinnaavoq Danmarkimi naalagaaffik danskit inatsisartuinut qinersinermi taasinerup isertuussaanissaanut akisussaasuusoq.
- Nunani avannarlerni nunani allani isummertarneq erseqqilluinnarpoq, nunami namminermi inatsisartunut qinersinermi taasinerup isertuussaanissaanut naalagaaffik akisussaasuusoq aammalu qinersisartut ataasiakkaat akisussaasuusut, inatsisissatut siunnersuummi allassimavoq.
Danmarkimi qinersinermi ileqquusoq malillugu innuttaasut angerlarsimallutik qinersivimmik immersuisinnaanngillat.