Qinersisartunik isumasiuisitsineq eqquutingajavippoq

Inatsisartunut qinersinngitsiarnitsinni qinersisartunik isumasiuilluni qinersinerup inernissaanik eqqueriaqattaartoqarpoq. Kalaallit Nunaata Radioa Sisimiuni Qaqortumilu qinersisartunik aamma isumasiutitsivoq. Qanormitaava isumasiuinerit naapertorlugit eqqoriaanerit piviusunut qanitsigaat?
juunip 03-at 2009 17:03

Ilisimatusarfimmiit misissuinermi qinersisartut 500-t isumasiorneqarnerat aallaaviuvoq. Taakkualu eqqoriaanerat tamatigungajak eqquuttutut oqaatigineqarsinnaavoq. Tassami taakkua IA-p 44 procentinik taaguunneqarnissaa eqqoriarpaat, tassa piviusut 0,3 procentiinnarmik uniorlugit.

Siumukkormiut 28 procentinnannissaat eqqoriaramikku uniuissunngilaat, tassami Siumukkormiut 26,5 procentinit taaguunneqarput.

Demokraatit 16 procentinnannissaat eqqoriaramikku, 12,7 procentinit taaguunneqarput.

Atassutikkut 9 procentinnannissaat eqqoriaramikku, 10,9 procentinit taaguunneqarput.

Kattusseqatigiit Partiiat 2 procentinnassagatinneqartoq 3,8 procentinit, tassa marloriaatingajaanit taaguunneqarpoq.

KNR-imiit isumasiuinerit aallaavigalugit eqqoriaanerit taama piviusunut qanitsiginnikkaluarlutik uniuivallaanngillat. Tassani soorlu IA-p 46 procentit missaannit taaguunneqarnissaa eqqoriarneqarpoq, tassa 2-3 procentiinnarnik uniuillutik.

Demokraatit Atassullu eqqaassagaanni taakkua taaguunneqarnerat eqqoriakkanut ungasinngillat. KNR-ip eqqoriaanerani aamma Kattusseqatigiit Partiiannik taasisut ikinnerussangatinneqaraluarput.

Isumasiuinerit aallaavigalugit eqqoriaasut ataatsimut isigalugit tassa uniuivallaanngillat.