Qinersinerup nalunaarutigineqarneratigut apeqqutit akineqarsinnaajunnaarput

2003-mi januaarip aallaqqaataaniit Naalakkersuisunut ilaasortaasarsimasut angalasarnerisa takussutissiornissaat suliarissallugu, Nunanut allanut Aqutsisoqarfimmut piffissarnartorujussuuvoq.
Allattoq Elisa Isaksen
maajip 29-at 2009 07:13

Demokraatini naalakkersuinermut tunngasuni siulittaasup tulliata Palle Christiansenip tamatumunnga takussutissanik januaarip tallimaannili qinnuteqarpoq, sulili tigusaqarni.

Tamanna pissutigalugu taassuma Naalakkersuisut paasissutissanik isertuussinerarlugit ippassaq pisuutippai, tamannali Naalakkersuisoqarfiup ilumuunnginnerarpaa.

Apeqqut suliassaavoq angisooq, matumanilu pisariaqartinneqarlutik naalakkersuisunut ilaasortaasarsimasut nikerartut angalanerinut tamanut ilanngussanik toqqorsivimmiittunik misissuataarinissaq aamma toqqorsivimmiittuutinik digitaliseeriisimannginneq pissutigalugu, sulineq naatsorsuutigisamit piffissamik atuinarnerusimavoq. Aamma apriilip 15-anni 2009-mi qinersinissap nalunaarutigineqarneratigut, pisariaqartinneqartuinnarnik suliaqalernikkut tamanna kinguarsarneqartoq, Naalakkersuisoqarfimmit tusagassiuutinut nalunaarutigineqarpoq.

Naalakkersuisoqarfimmi toqqortat aningaasartuutinullu uppernarsaatit pissarsiarisinnaanissaasa ajornannginnerulernissaat, siunissami qularnaarniarneqarpoq. Taamaaliornikkut apeqqutit tamakkununnga tunngasut piffissaliussami sivikinnerusumi akineqarsinnaalernissaat anguniarneqarpoq.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq