Qinersinermi naliliisartoq: Partiit suleqatigiinniarnerat tatiginarpallaanngillat
Demokraatineersut Inuit Ataqatigiinneersullu Siumukkunnik suleqateqarusunnatik oqariartuuteqareerput, Atassutikkunnit kina naalakkersuinikkut siulittaasussatut tapersersorneqassanersoq, partiit siulittaasuisa KNR-imi sapaatiuppat apeqqarissaarneqareerneranni aatsaat oqaatigineqarumavoq.
Suleqatigiinnissamilli oqariartuutigineqartut tatiginassusaat killeqartoq, qinersinermi naliliisartoq Sten Lund erseqqissaavoq.
Isumasiuinerit kingulliit takutippaat Inuit Ataqatigiit qinersinerup kingorna Siumukkunnut sanilliullugit taaguunneqarnerpaassasut. Siumut sinnerlugu qineqqusaartut ilaat inuiaqatigiit aningaasaataannik atornerluisutut isornartorsiorneqarneri pissutigalugit Siumut partiinit suleqatigineqarusunngilaq. Illuatungiliuttutut maanna inissisimasut Demokraatineersut aamma Inuit Ataqatigiinneersut qinersereernerup kingorna Siumut suleqatigiumanagu oqariartuuteqareerput.
Inuit Ataqatigiit qinersereernerup kingorna amerlanerussuteqartussatut naatsorsuutigineqartut Kattusseqatigiit Partiiannit suleqatigineqarusupput. Sorlaat partiiata suleqatigiinnissami kina orniginartinnerunerlugu oqaaseqarumanngilaq.
Siumukkunnik naalakkersuisoqateqaqqinnissamik Atassut qineqqusaaruteqaraluartoq, maanna allanik suleqateqarsinnaanermik periarfissiivoq. Partiit siulitaasuisa sapaatiuppat KNR-imi apeqqarissaarneqarneranni oqariartuutigiumaagaat, suleqateqatigiinnissamik tunngaviliissasut Atassummi siuttunit oqaatigineqarpoq.
- Partiit siulittaasuisa apeqqarissaarneqarnerini oqaaserineqartut tusarnaaqqissaassavagut, Atassutip siulittaasua Finn Karlsen oqarpoq.
Partiit akornanni nuliarsarnerit avissaartuunnerillu tatiginassusaat killeqartoq, qinersinermi naliliisartoq Sten Lund oqarpoq. Partiit suleqatigiinnissamik oqariartuuteqartarnerat piviusunngortanngitsoq, tamannami qinersinerit siuliisa takutittareerpaat.
- isumasiuinerit aallaavigalugit politikkerit isummikkajuttarput, tassuuna qinersisartunik aallernissartik siunertarisaramikku. Qinersereernerup kingorna takuneqartarpoq, qinersisut aalajangiisutut nalilerneqartartut. Taamaasilluni inatsisartuni suleqatigiilertut isertut amerlassusaat aallavigisarpaat, qinersinermi naliliisartoq, cand. scient. pol., Sten Lund oqarpoq.
