Qinersinermi ilisimasassatit: Ima malinnaasinnaavutit qinersivissamullu apuullutit

Inatsisartunut qinersinissamut ulloq nalliuppoq. Ilaasortat 31-t qinerneqassapput. Qinersinerup kingorna kikkut Inatsisartuni issialissanersut innuttaasunit aalajangerneqassaaq.

Allattoq Pipaluk Egede Poulsen

marsip 11-at 2025 13:16

Nutserisoq Pipaluk Egede Poulsen

Qinersiviit nuna tamakkerlugu ullaaq manna nalunaaqutaq qulingiluanut ammarput, unnugulu nalunaaqutaq arfineq-pingasunut matussallutik.

Paasissutissat qinersisoqarnerani malinnaanissamut tunngasut KNR-imit paasissutissiissutigineqarput.

Tassami Kalaallit Nunaanni najugaqavikkuit, 18-ileereerlutit, qaammatinilu kingullerni arfinilinni minnerpaamik najugaqarsimallutit, danskisullu innuttaassuseqarlutit qinersisinnaatitaasutut allattorsimaffimmiipputit.

KNR-imi aallakaatitsinissamut pilersaarutit

KNR radiomi sumiiffinni assigiinngitsuniit toqqaannartumik qinersivinniillu ataatsimoorfinniillu ilanngutassiisoqassaaq.

KNR-ip nittartagaatigut KNR.gl-ikkut, KNR-illu Facebookimi qupperneratigut ulloq naallugu malinnaasoqarsinnaassaaq.

KNR TV-mi unnugu KNR1 aamma KNR2 aallakaatitsiffiussapput, KNR1 kalaallisut aallakaatitsiffiussaaq, KNR2-lu danskisut nutserneqartumik aallakaatinneqassaaq.

Qinersinermi kingullermi ima ingerlasoqarpoq

Qinersinermi kingullermi, 2021-mi, qinersineq peqataaffigineqarluarpoq 65 procentinillu qinersisoqarluni.

2021-mi qinersisinnaasut: 41.126-t, ukiormannalu 600 sinnilinnik ikileriarsimapput qinersinissamut.

6,9 procentiisa Atassut qinersimavaat, taakku 1878-init qinerneqarsimapput

9,1 procentiisa Demokraatit qinersimavaat, taakku 2454-init qinerneqarsimapput

36,6 procentiisa Inuit Ataqatigiit qinersimavaat, taakku 9933-nit qinerneqarsimapput

12 procentiisa Naleraq qinersimavaat, taakku 3252-init qinerneqarsimapput

29,5 procentiisa Siumut qinersimavaat, taakku 7986-init qinerneqarsimapput

Februaarimi qinersisoqarnissaa suaarutigineqangajalermat IA aqqanilinnik ilaasortaatitaqarpoq, Siumullu qulinik ilaasortaatitaqarluni. Taakku amerlanerussuteqarlutik naalakkersuisooqatigiipput.

Taakku saniatigut Naleraq sisamanik Inatsisartuutitaqarpoq, Atassut marlunnik kiisalu Demokraatit pingasunik.

Partiit taakku tallimat saniatigut partii nutaaq Qulleq siullermeerluni qinigassanngortitsivoq.

Kalaallit Nunaanni Inatsisartunut qinersinermi killilersuutaasumik ataatsimoortumik ikinnerpaaffiliisoqanngilaq, kisianni ataatsimik inissinneqassagaanni qinersisartut tamakkerlutik qinernerisa missaani pingajorarterutaata missaanik qinersineqarsimassaaq.

Allisiguk

Unnugu arfineq-pingasunnguliivinnerani nal.19:55 aallakaatitsineq TV-p aallakaatitsivianiit aallartissaaq, nal.20 qinersiviit matuppata kisitsinerit pineranni aallakaatitsivimmiit aallakaatitsinerit ingerlanneqassapput, ilaatigut Sisimiuniit Qaqortumiit Uummannamiit tusagassaqartitsisoqassaaq.

Unnunnerulaakkullu Nuummi partiit kateriffiinut unnussiuaarfiinut angalaartoqassaaq, kisitsisillu unnuup ingerlanerani pissarsiarineqartut saqqummiunneqallattaasassallutik.

Naliliisartunik pulaartoqassaaq, Jenseeraq Poulsen aamma Kuupik Kleist. Qanoq qinersisoqarsimaneranik naliliissapput, piffinni assigiinngitsuni, kikkullu qanoq taaguunneqarsimatiginersut sammineqassallutik.

Kingullertut naggasiutigalugu partiit siuttui katersorneqassapput pulaartuullutik.

Pitsorluttut innarluutillillu angallanneqassapput

Kommunini tamani pitsorluttut innarluutillillu qinersiartorsinnaanngitsut biiliunneqarnissaminnik periarfissaqarput.

Avannaata Kommuniani Ilulissani busseqanngimmat utoqqarnut innarluutilinnut pitsorluttunullu biiliussisinnaapput, sianerfissaq: 26 76 24.

Uummannami sianerfissaq: 54 95 20.

Upernavimmi sianerfissaq: 39 78 81 imaluunniit 38 78 83.

Qaanaami sianerfissaq: 22 21 67 imaluunniit 38 95 56.

Kommune Qeqertalimmi sianerfissaq: 70 19 00.

Aasianni sianerfissaq: 27 99 79 aamma 28 01 59.

Kangaatsiaq: 59 62 33.

Qasigiannguani sianerfissaq: 54 01 39.

Qeqertarsuarmi sianerfissaq: 54 12 68.

Qeqqata Kommuniani Sisimiuni utoqqaat innarluutillit pitsorluttullu innuttaasunik sullissivik 70 21 00 sianerlutik taxanik aaneqarsinnaapput. Anisinnaanngitsunut aamma periarfissaqarpoq 70 21 00-mut sianernikkut takkuttoqarsinnaavoq taasivissaanik nassarluni.

Kommuneqarfik Sermersuumi innuttaasunut utoqqarnut pitsorluttunullu immikkut sianernikkut biiliussissapput illoqarfinni sisamani:

Paamiuni sianerfissaq: 49 92 77.

Tasiilami sianerfissaq: 59 82 15.

Nuummi sianerfissaq: 28 32 82.

Taakku saniatigut ulloq naallugu Nuummi bussit marluk akeqanngitsumik angalassapput.

Kommune Kujallermi illoqarfinni minnerusuni Narsami Nanortalimmilu utoqqarnut pitsorluttunullu sianerfissat:

Narsami sianerfissaq: 29 84 55.

Nanortalimmi sianerfissaq: 22 72 67.

Qaqortumi sianerfissaq: 64 81 01, aamma bussit akeqanngitsumik ingerlapput.

Illit isummat pingaartittaqaarput. Nutaarsiassaq pillugu isorisat nersualaarinerillu uani tikilluaqquagut.