Trump Putinimik marlunngornermi oqaloqateqassasoq

Donald Trumpip Vladimir Putinimik oqaloqateqarnissani tusagassiortunut præsidentip timmisartorsuani Air Force One-imi ataasinngornermi ullaakkut oqaatigaa. Nutaarsiassaqartitsivik Reuters taama allaaserisaqarpoq.

Præsidentit marluk taakku oqarasuaatikkut marlunngornermi oqaloqatigiissasut Ruslandip aamma uppernarsarpaa. Putinip oqaaseqartartua Dmitrij Peskov taama ilisimatitsivoq. Nutaarsiassaqartitsivik Reuters taama allaaserisaqarpoq.

- Præsident Putin marlunngornermi oqaloqatigissavara. Sapaatit akunnerata naanerani sulilluartoqarpoq, Trump, Washington D.C.-mit Floridaliartilluni oqarpoq.

- Ukrainemi sorsunneq soraarsissinnaaneripput takussavarput. Immaqa iluatsissinnaassavarput, immaqa iluatsissanngilarput, taanna oqarpoq.

Qaqugu oqaloqatigiissanersut oqaatigineqanngilaq

Ruslandip Ukrainellu akornanni oqallinnernut tunngasumik marlunngornermi oqaaseqarsinnaassagunarnini Trumpip ilanngullugu oqaatigaa.

Sunarpiarli nalunaarutigineqarumaarnersoq oqaatigineqanngilaq.

Trump Putinilu qaqugukkut oqaloqatigiissanersut aamma nalunaarutigineqanngilaq.

Ukrainemi ulluni 30-ni sakkuaakkunnaarallartoqarnissaanut siunnersuut USA-p sapaatit akunnerata siuliani saqqummiuppaa.

Ukrainep siunnersuut tapersersorpaa, siunnersuulli tapersersussaguniuk pinngitsoornani naammisassaqartoq, Putinip oqaatigaa.

Illuatungeriit sapaatit akunnerata naanerani silaannakkut saassusseqattaarput.

Trumpip Putinillu sapaatit akunnerata massuma ingerlanerani oqaloqatigiinnissaat naatsorsuutigineqareerpoq.

Trumpip Putinillu sapaatit akunnerata massuma ingerlanerani oqaloqatigiinnissaat ilimagalugu, USA-p Kangia Qiterlermi immikkut aallaartitaata Steve Witkoffip sapaammi oqaatigaa.

Putin ataatsimeeqatigereerlugu taama oqarpoq.

Ruslandip Ukraine 2022-mi februaarip ulluisa 24-anni saassutilerpaa.