Qinersinermi ataatsimiititaliami makitsinerit pingasut ingerlanneqartussanngortut
Inatsisartunut qinersinerup inernerata naammagittaalliutiginissaanut piffiussaliussaq unnuaq qaangiuppoq, taamaammat qinersinerup inernera akuersissutiginiarlugu Qinersinermi ataatimiititaliami ualimut ataatsimiittoqassaaq.
Naammagittaalliutinillu tigusaqartoqarsimanngimmat qinersinermilu annertunerusumik pisissusissamisuunngitsunik pisoqarsimanngimmat qinersinerup inernerata akuersissutigineqarnissaa Qinersinermi ataatsimiititaliap allattoqarfianeersup Klaus Georg Hansenip naatsorsuutiginerarpaa.
Taamaammat qinersineq akuerineqarsinnaanersoq Qinersinermi ataatsimiititaliap aalajangertussanngorpaa, Klaus Georg Hansen oqarpoq.
Qinersinermili ataatsimiititaliaq aamma allamik suliassaqarpoq. Ataatsimiititaliarmi ataatsimiinnermini pingasoriarluni makitsisussaasoq. Qinigassanngortittut marluk amerlaqatigiinnik taaguunneqarsimagaangata allattorsimaffimmi inissisimanerat aalajangerniarlugu makitsisoqartarpoq. Makitsissutigineqartussanilu pingasuni qinigassanngortittut sinniisussat allattorsimaffianni allaqqasut pineqarput.
AAMMA ATUARUK Qinersinermi ajugaasut ajorsartullu
Pissangallutik makitsinerup inerneranik utaqqissagunartut tassaapput Partii Naleqqameersut Anthon Frederiksen aamma Emanuel Nuko. Taakkumi arlaat sinniisussat allattorsimaffianni siullertut allaqqassanersoq makitsissutigineqartussaavoq.
Partii Naleraq qinigaaffiup siulianitulli naalakkersuisooqatigiinnut, Hans Enoksenip naalakkersuisuuffigisaanut, peqataaqqissagaluarpat, Hans Enoksenilu Inatsisartunut ilaasortaaffimminit sulinngiffeqarallassagaluarpat, taava sinniisussat allattorsimaffianni siullertut allaqqasoq Inatsisartunut ilaasortanngussaaq.
Qinersinermi ataatsimiititaliamut ilaasortat tassaapput Naalakkersuisut siulittaasuata naalakkersuisoqarfiani pisortaq, Søren Hald Møller, biskoppi Sofie Petersen aamma kommunit kattuffianni pisortaagallartoq Pétur H. Gudmundsson.
Klaus Georg Hansenip paasissutissiissutigaa qinigaasut allattorsimaffiat politiinut qinersinerup aqaguani tunniunneqartoq. Qinigaasut pinerluuteqarsimanersut politiinit misissorneqartussaanera tamatumunnga pissutaavoq, misissuinerullu inernera inatsisartunut tunniunneqassaaq.
