Qaammatit kingulliit nunarsuarmi pisut soorlu politikkimi, oqaluttuarisaanermi inuiaqatigiinnilu atukkat nunatsinnittaaq oqallisaasimapput, taamaattorli ullumikkut inuttaasut qinersisarfimmut iserunik kommuninut qinersivimmut krydseliisussanngoruni pisut qaninnerusut initunerutillugit taasisussaapput.

Qinersineq kommunini tallimaasuni ingerlanneqarpoq, tassa avannaaniit Avannaata Kommunianiit kujammut Kommune Kujallermut. Illoqarfimmi pingaarnermi ulappuseruttorput naak sila issikkaluartoq nittaakkaluartorlu innuttaasut qinikkaminnik apuussiartorput.

Ullaaq Inatsisartunut qinersinermiit qinersiartortukinneruvoq, ullup qeqqariartorneranili taasiartortut procentiat amerlisimavoq.

Godthåbhallep saani partiit ileqqoq malillugu kaffillerlutillu kaagillerput. Qungujulaarneq, assamminneq oqaloqatigiinnerillu silaannaq nuannersuutippaa, qineqqusaartut kajumissutsiminnillu suliaqartut qinersiartorlutik nangaasut qularunnaarsinniarsaraat partiimik qinerneqarnissaat tunngavilersorlugu.

Massakkut ersarissivoq ulloq qinersivik tamat oqartussaanerannut persuarsiorfiuvoq, innuttaasut sumiiffigisaminni aaliangersaanerit pingaaruteqartut takutimmassuk – sila apeqqutaatinnagu.