Ullumikkut tamat oqartussaaqataanerisa aamma ulloraat. Qinersiviit ammarpata kommunini tallimani kikkut kommunalbestyrelsiniilissanersut taaguunneqassapput.

Qinersisoqarnissaata suaarutigineqannginnerani kommunini tamangajanni Qeqqata Kommunia Naleqqap IA-mit taaguunneqarneruffigisaa minillugu Inuit Ataqatigiit aamma Siumut partiini annerpaapput.

Taasinerit qanoq agguataarneqarnersut qinersiviit matoreerpata taaguussinerillu kisinneqareerpata unnuami aatsaat paasineqassapput.

Qinersisinnaatitaanermut piumasaqaatit naammassisinnaagukkit ullaakkut nalunaaqutaq qulingiluanit unnugu nalunaaqutaq arfineq-pingasut tungaanut qinersiartorsinnaavutit. Qinersisinnaanissannut ikinnerpaamik 18-inik ukioqassaatit kommunerisannilu sivikinnerpaamik sapaatini arfinilinni najugaqarsimassallutit.

Tamatuma saniatigut danskisut innuttaassuseqassaatit nunatsinnilu sivikinnerpaamik qaammatit arfinillit ataannartumik najugaqarsimassallutit. Danskisut innuttaassuseqanngikkuit nunatsinni qaammatit arfinillit najugaqareernivit saniatigut - naalagaaffeqatigiinni sivikinnerpaamik ukiuni pingasuni najugaqarsimassaatit.

Qinersinerit assigiinngitsut

Kommunalbestyrelsimut qinersisoqarnerata saniatigut nunaqarfiit siulersuisuinut aamma iligiinnut qinersisoqassaaq.

Nuummi iligiinnut qinersinertaqanngitsumik ilaasortanngortoqassaaq. Tassa imaappoq qinigassanngortittut amerlannginnerat pissutigalugu qinersinissaq pisariaqanngilaq.

Nunaqarfiit siulersuisui kommunalbestyrelsip ataaniipput. Tassa imaappoq nunaqarfiit siulersuisuisa aningaasanik atuinissaanut kommunalbestyrelse akuerseqqaartarpoq. Kommunalbestyrelsillu nunaqarfiit siulersuisuisa sulerinissaat oqaatigisarpaat.

Nunaqarfiit siulersuisuisa susassaqarfiit uku suliassarisinnaavaat: Kulturikkut aamma inunnut qaammarsaaneq, timersornerit, teknikkimut pilersuinermullu tunngasunik suliaqarneq, nunaqarfimmi inuussutissarsiornermut pilersaarusiorneq innutaasunullu sammisaqartitsinerit.

Kommunini- nunaqarfinni siulersuisunut kiisalu iligiinnut ukiut sisamakkaarlugit qinersisoqartarpoq.

Uani qinersisinnaavutit