Qinersiartortut kingullermernit suli ikinnerupput

Taamaattoq Aasianni nalunaaqutaq tallimanut taasiartortut 2008-mut sanilliullugu amerlanerupput, tassa ullumi nalunaaqutaq tallimanut taasisinnaasut 45 procentii qinersereersimammata, 2008-mi taamaallaat 36 procentit qinersisimasut.

Aasianni taasisitsisoq, Ole Albinus oqaluttuarpoq 2008 qinersisartut taama ikitsiginerinut pissutaasoq Aasiaat taamani silarluttukasiusimammat.

Nuummi qinersisartut ualimut tallimanut taasiartorsimapput 37,24 procentit, 2008-mi 37,65 procentiullutik, appariaat annikitsunnguaq.

Illoqarfinni nalunaaqutaq tallimanut taasiartorsimasut Qaanaami amerlanerpaapput, tassa qinersisinnaasut 58 procentii taasisimammata, taamaattoq aamma Qaanaami 2008-mut sanilliullugi nalunaaqutaq tallimanut qinersiartorsimasut appariarput, taamani taasiartorsimasut 66,36 procentiummata.

Illoqarfinni qinersiartortukinnerpaavoq Tasiilami, ualimut nalunaaqutaq tallimanut taasiartorsimallutik 35,34 procentit.

Taasiviit aatsaat nalunaaqutaq unnugu arfineq pingasunut matussapput, tassalu suli qinersisimanngitsut periarfissaqarput taasiartornissaminnut.