Qineqqusaartut soqutiginarsaallutik sukataarput
Inuit najukkaminni politikkimut soqutiginninnerat annikillisimavoq. Kommuninut qinersinerni kingullerni marlunni qinersiartorsimasut ikiliartuinnavissimapput, qinersisartunullu ataatsimiisitsinissaraluit marluk tusarnaariartortukinnera pissutaalluni maannamut taamaatiinnarneqareerput.
Demokraatit Nuumi qinersisartunut soqutiginarsaallutik ataatsimiisitseriaraluarput, iluatsinngitsumilli.
-Ajoraluartumik sapaatiummat Nuup innuttaasui ikitsuararsuit taamaallaat takkupput, amerlanerpaallu isersimasut tassaapput sassartut partiininngaanneersut, taannalu pissutigalugu taamaatiinnarparput,Kommuneqarfik Sermersuumi Demokraatit siulittaasuat Aviaaja Karlshøj Poulsen Nuumi ippassaq ataatsimiisitsiniarnerugaluup taamaatinneqarnera pillugu taama oqarpoq.
Inatsisartunut qineqqusaarnerit arlallit qaammat kingulleq ingerlanneqaqattaarput, qinersisartullu qineqqusaarutinut maanna naammatsiinnarsimassasut, Sermersuumi Demokraatit siulittaasuat isumaqarpoq, aammali porskikkunni assammik arsaalluni ujakkaarnermillu pissartanngorniuunnerit ataatsimiisitsinermut takkuttukinneranut patsisaaqataasorineqarput.
-Taakku tamarmik pisuupput, ippassaq takkuttoqannginneranut, Aviaaja Karlshøj Poulsen oqarpoq.
Partiit allat qineqqusaartitaat Nuummi ilinniarnertuunngorniarfimmi ataatsimiisitsinissaraluanni nutaaliorlutik aaqqissuussisimagaluarput. Tassa ilinniarnertuunngorniarfimmi init sisamat qineqqusaarfissatut atorneqartussaasimagaluarput, soorlu inunnik isumaginninnermut tunngasunik partiit assigiinngitsut qineqqusaartitaat inimi ataatsimi naapinneqarsimasinnaallutik, inuussutissarsiutinullu tunngasunik partiit qineqqusaartitai inimi allami qinersisartunut saqqummiussinissaat pilersaarusiorneqarsimagaluarluni, taamatut aaqqissuussinermi qineqqusaartut itisiliinissaminnut periarfissaqarnerussasorineqarmata, innuttaasullu paasisaqarluarnerussasorineqarmata.
-politikkimut isissagaluarpata, kommunalbestyrelsemi taava suna sulissutigerusuppaat, suna soqutigivaat. Taanna apuuttariaqarpoq inunnut, taannaana aamma pingaartinnerpaagipput, taava imatut aaqqissorparput, neriuppugut siunissamut iluatsikkumaartoq taava iluatsilluarlugu Aviaaja Karlshøj Poulsen oqarpoq, erseqqissaatigissavarpullu taanna Kommunemut qineqqusaanngimmat.
Kommunemut qinersinermi kingullermi 2008mi qinersisinnaasut 62’2 procentit qinersiartorput, tassa 2005imi kommunemut qinersinermut sanilliullugu qinersisinnaasut 10 procentimik ikinnerit qinersiartorsimallutik.
Qinersisartut kisimik kommunemut qineqqusaarnermut soqutiginninnerat annikinngilaq, aamma aviisimi anginerpaami Sermitsiaq:AGimi sulisut 12t Portugalimut angalaarput, sulisullu sinneri arfiniliusut nittartakkamut aviisimullu suliaqartuussapput.
