Qineqqusaartoq: 'Herstedvester Danmarkimut nikanarsaat'

Qinersisartunik ataatsimiititsisoqarmat kalaallit parnaarussat tallimat peqataapput, taakku Herstedvesterimi piffissami aalajangersimanngitsumi parnaarussaapput. Aviisimi Politikenimi tamanna allaaserineqarpoq.

Oqallittut akornanni assorsuaq isumaqatigiinngittoqaraluartoq, apeqqut ataaseq oqallittunit tamanit isumaqatigineqarpoq.

- Pineqaatissinneqaraangatta sooq Nunatsinniissinnaanngilagut, sooq marloriaammik pillagaasassaagut? Sugattaana sakkortunerusumik pillagaasartugut, kalaallit parnaarussat ilaat aperaaq, qallunaallu qinigassanngortittut tamanna akiuminaatsippaat.

- Danmarkimut nikanarsaat, kalaallit Danmarkimut parnaarussaajartortinneqartarnerat pissusissamisoornersoq Liberal Alliance-meersoq, Joachim B. Olsen, aperineqarami akivoq.

Socialdemokratineersoq Mogens Lykketoft akivoq, kalaallit pineqaatissinneqartut Kalaallit Nunaanni parnaarussaasalernissaannik suliniut sukkanerulissasoq neriuutigigini.

Nunatsinni matoqqasumik parnaarussiveqalernissamik pilersaarut tuaviuunneqarnerulissasoq, Inatsisinik atortitsinermut naalakkersuisup, Anthon Frederiksenip, Danmarkimilu inatsisinik atortitsinermut ministerip, Lars Barfoedip, upernaaq neriorsuutigaat. Matoqqasumik parnaarussiveqalernissamut pilersaarut ingerlariaqqinneq ajuleraluarpoq, Nuummi inissiffissaata sanaartorfigiuminarsaanissaanut ilimagisamit aningaasartuuteqarnerunissaq utoqqatsissutigineqarluni.