Qinigassanngortinneqartussat kikkuuneri partiinit suli piareersimaffigineqanngitsut
Partiillu Siumut, Inuit Ataqatigiit Atassullu maannamut piareersimanersaallutik inissisimapput.
Inuit Ataqatigiit qineqqusaartitassatik aqagu nalunaarutigissagaat, partiimi allattaanerup Flavia Lyberthip oqaatigaa.
Siumup allattaanerata oqaatigaa, Partiimi siulersuisuunerit unnummut nalunaaqutaq arfineq-marlunut ataatsimiissasut. Taassuma kingorna kikkut Siumumit qineqqusaartinneqassanersut tusagassiuutinut nalunaarutigissavaat.
Atassummilu siulittaasup naalakkersuisunilu ilaasortap Knud Kristiansenip KNR-imut qiimaqaluni oqaatigaa, Atassummit qineqqusaartitassat marluk tusagassiuutinut katersortitsinikkut aqagu imaluunniit kingusinnerpaamik aqaguagu saqqummiunneqarumaartut. Qinigassanngortitassat marluusut kikkuuneri oqaatigisinnaannginnerarpaa.
Aamma atuaruk Pisortatigoortoq Folketingimut juunip 18-iani qinersissaagut
Demokraatit siulersuisuunerisa qineqqusaartussat ataatsimiissutiginissaat suli maannamut periarfissaqarfiginngikkaat Michael Rosingip, Demokraatit sinnerlugit Inatsisartuni ilaasortap oqaatigaa. Taassuma aamma oqaatigaa siulersuisuunerit sapaatip-akunnerata tulliani aatsaat naapinniartut, qineqqusaartussatillu tamatuma kingorna aatsaat nalunaarutigisinnaassagaat.
Partii Naleqqamilu siulittaasup Hans Enoksenip KNR-imut oqaatigaa, partiimit nalunaaruteqarnissaq suli piareersimaffiginngikkitsik. Inatsisartuni ulapaarneq pissutaavoq:
- Taamaattumik ullumikkut nalunaaruteqarnissatsinnut piareersimanngilagut, Hans Enoksen oqarpoq. Taassumalu aamma oqaatigaa kikkut qineqqusaartinneqassanersut suli oqaatigisinnaanagu.
Naalagaaffiup sinniisua allakkamik aatsaarluinnaq nassiussivoq, Folketingimut qineqqusaartussanik nalunaarutiginninnissamut killigititaasoq tassaasoq sapaat juunip arfineq-aappaat nalunaaqutaq ullup qeqqanut.