Qimuttunik qimmilik: Qimmeqarnermut inatsit naammaginanngilaq

Qeqertarsuarmiu Jens Møller qimminik allanertanik Qeqertarsuarmut eqqussisoqarsimasoralugu pasitsaassisoqarnera pillugu Naalakkersuisoqarfimmut aamma Uumasut Nakorsaqarfiannut arlaleriarluni siorna allagaqartarsimavoq.

- Nuanninngikkaluartoq taamatut killittoqarnera ajorinngilara suliap ingerlaqqinnissaanut aqqutissaq ilaammat, Jens Møller oqarpoq.

Qeqertarsuarmummi qimminik allanertanik 2017-imi aasakkut ilumut eqqussisoqarsimanersoq unnerluussisussaatitaasunit maanna misissuiffigineqaleruttorpoq.

- Uanga neriuutigivara una pisoq politikerinik taavalu politiinit nersutit nakorsaaneqarfiannillu eqiiallaatigineqarumaartoq, taavalu suleriutsit inatsisit naleqqussarneqarnissaannik kinguneqarumaartoq, Jens Møller oqarpoq.

AAMMA ATUARUK Illersuisoq aamma Inatsisartunut ilaasortaq akuliuppoq: - Suliaq una ilinniarfigisariaqarparput

Unnerluussisussaatitaasut suliamut misissuillutik tallimanngormat uppernarsarpaat. Allanertanillu Qeqertarsuarmut eqqussisoqarsimassappat qanoq kinguneqartinneqarsinnaanersoq oqaatigisinnaanngilaat. Kisianni qimmeqarnermut qitsuuteqarnermullu inatsit unioqqutinneqarsimatillugu akiliisitsinermik kinguneqaqqakujuttartoq ilisimatitsissutigineqarpoq.

- Uanga taanna inatsit affakuinnartut isigivara. Kalaallit qimmiat illersorneqassooq. Allaninngaanniit eqqussisoqassanngilaq. Kisianni eqqussisoqarpat qanoq iliuusissat allaqqanngillat. Taamaattumik nutarterneqartariaqarpoq naleqqussarneqarlunilu. Taamaaliunngikkaanni qimmerput annaassuarput eqqussisoqartarneratigut, Jens Møller oqarpoq.

Kommune Qeqertalimmit qimmit allanertatut pasineqartut piginnittuata siorna oktobarimi toqutsissimagai siusinnerusukkut ilisimatitsissutigineqareernikuuvoq.

AAMMA ATUARUK Qimmit qimuttut pillugit suliaq: Unioqqutitsilluni eqqussisoqarsimasinnaaneranut politiinut tunniussisoqarsimavoq