Qimussimik sukkaniuttoqassatillugu qimminut serlersaarisoqartartoq
Qimuttut sukkaniunnissaminnut nerisassanik sapigaannik nerisinneqartarnerat ukioq manna ajornartorsiutaaqqippoq.
Qimussertartut marluk Zakorat Zeebip aamma Ilannguaq Berthelsenip Facebookikkut oqaluttuaraat.
Taakku qimuttui Avannaata Qimussersuinut Qeqertarsuarmi Ilulissanilu arfininngormat anngunniunnissamut sapigaannik nerisinneqarsimapput.
Taakku suliaq tusagassiuutitigut oqaaseqarfigerusunngilaat.
Aatsaat siullermik taamaaliortoqanngitsoq
Allap tassa qimussiussisoq, William Jensenip Saqqameersup qimuttuimi meriarnerat aamma nalaassimavaa.
- Naamik tassa nuanniinnersaavoq taamatut misigisaqarluni, kingorna paasillugit taamaaliorneqarsimasut misigisat nuanniittorujuusarput, taanna oqarpoq.
Taanna peqatigiiffimmit Qimussersaq 71-imi siulittaasumit, Emil Mathiassenimit taperserneqarpoq, tamannalu tamanna unitsinneqartariaqartoq isumaqarpoq.
- Tusartakkat malillugit qanga qangali tamanna aamma ingerlasimavoq, taanna oqarpoq.
Nakkutilliisoqassasoq
Qimuttullu serlersaariffigineqartarnerat pakatsinartoq William Jensen isumaqarpoq, tamannami qimmunut sunniuteqartarpoq, aamma qimussiussisup piareersaatigisimasaanut tamanut aseruisarpoq.
Peqatigiiffik Qimussersaq 71 ajornartorsiummik qaangiiniarnissaq siunertaralugu tulliani Ilulissani marsip ulluisa 16-ianni sukkaniuttoqarnissaanut qimuttunut ulloq unnuarlu nakkutilliisoqarnissaa aalajangerpaat, siulittaasoq, Emil Mathiassen oqarpoq.
Tamanna William Jensenip pingasoriarluni ajugaareernikuusimasup ukioq mannalu peqataanissamut anngussimasup toqqissiallaatigaa.
- Tassa toqqissisimanassooq, uangaana peqataasalerninniik taamatut inunnguit eqqarsartanngikkasoralugit soqutigivallaarneq ajoraluarakkit paarsisoqartarnissaa. Kisianni kingorna paasivara tassa taamaattoqarsinnaasoq, taamatut aaqqissuisimasut assorujuk iluassooq toqqissisimanartorujuussapput paarsilluarniarsimasut qimminut.
Taassumali inuit unamminermi ingerlalluartunik nuannaarutiginnissinnaannginnerat paasisinnaanngilaq.
- Neriuppunga tamakku pinaveersaartinneqarumaartut, qimminnguaq aamma naalliulluni ingerlasussanngortarpoq taamaalineqaraangami inuttami nalusaanik, taanna oqarpoq.