Timersorneq

Qimussillammak Ville Siegstad naggataamik sukkaniuteqataalerpoq

Avannaata Qimussersuinut Ilulissani anngunniulluni martsip aappaat sukkaniunneq oqaluttuarisaanermut ilanngutissaaq qimussillammassuaq angusarissaartarsimaqisoq naggataassammat.

Allattoq Noah Mølgaard

februaarip 13-at 2024 07:55

78-nik ukiulik qimussertartoq Ville Siegstad Ilulissaneersoq qimussimik sukkaniulluni Nunatsinni pissartanngorniunnissamut Avannaata Qimussersuinut anngunniuttussanut ilaassamaaalerpoq.

Iluliarmiut anngunniullutik martsip aappaat sukkanniutilerpata ulloq taanna Ville Siegstadimut immikkuullarittussaavoq.

- Siornali aalajangernikuuvunga ukioq manna naggaamik peqataaniarlunga. Tamanna pivisunngortilerpata ukiormannalu tassa naggataassuunga, Ville Siegstad KNR-mut oqarpoq.

- Aalajangerninnut tunngaviunerpaapput ukiukka. Taamatut ukioqalerluni qangatut nukiit ikkunnaartarput ilaatigullu qimusserani angerlarsimalluni eqiasuataarnissaq ajornannginnerulertarluni, Ville Siegstad oqarpoq.

Avannaata Qimussersui 2024

Qimussimik sukkaniunneq ukiut tamaasa ingerlanneqartartoq ukioq manna marsip 16-iani nunatta kitaani ingerlanneqassaaq.

Ukioq manna Ilulissani sukkaniuuttoqassaaq.

Avannaata Qimussersua ukiut tamaviisa ingerlanneqartarpoq. Avannarpasinnerpaamit Upernavimmiit kujasinnerpaamut Sisimiuneersunut peqataasoqartarluni

Unammineq ukioq manna Avannaata Qimussersuinik taagorneqarpoq. Taanna ukiut pingajuanni ingerlanneqartarpoq. Nunatta kitaaneersuut saniatigut Ittoqqortoormiinit Tasiilamiit aamma Qaanaamiit peqataasoqartarluni.

Sukkaniuttarsimanera napariaaniit kingumut qiviaraani nuannaartunarluinnartoq takusassaavoq.

Ville Siegstad sisamariarluni Avannaata Qimussersuani ajugaasuusarpoq Ilulissanilu illoqarfimmioqatigiit sukkaniunneranni ajugaasarnikooqaluni.

Sukkaniunnerit 50-it

Siornatigut aamma Qeqertarsuup tunuamiut sukkaniuttarallarmata Ville Siegstad ajugaasuunikuuvoq.

Sukkaniuttarnerpassuarnerminilu immikkut eqqaamasaqarnersoq pillugu aperineqarami akivoq:

Aamma atuarukIttoqqortoormiit Avannaata Qimussersuini siullermeertumik peqataassasut

- Taamatut kingumut qivianngilanga, Ville Siegstad oqarpoq.

- Eqqarsaatigineruakka iluliarmiut sukkaniuttarneranni peqataasarnerpassuakka. Maanna tassa 50-issaat peqataasussanngorpunga aamma tamanna aalajangeeqataavoq maanna naggataartussanngorninnut, Ville Siegstad oqarpoq.

Ilulissani anngunniunnermi sukkanerit tallimat Avannaata Qimussersuinut anngutissapput

Ville Siegstad ukioq manna angusassatigut ilimasuuteqarpallaanngilaq quaalluni orlunermi kingorna qimminik sungiusaanini uninngatittariaqarsimagamiuk.

Siulliilli tallimat akornanniissaguni naggataarnissaa martsip 16-anut kinguassaaq ulloq taanna Avannaata Qimussersui sukkaniutissammata.

Ville Siegstad Avannaata Qimussersuani 1996, 2004, 2009 aamma 2019 ajugaasuuvoq. Kalaallit Nunaanni qimussertartut kattuffianni KNQK-mi aamma ataqqinaammik ilaasortaavoq.