Qimussernermut allagartartaarit

Takornariat qimussimik ingerlatsisinnaanermut allagartartaarsinnaanngussapput. Taanna pissarsiarsinnaassavat ullut marluk pikkorissarnerup kingorna. Tassani ilinniarneqassapput qamutit sananeqaataat, qamutit usilersortarnerat, iperartorneq, anulersuineq, qimminik qammaaneq kiisalu qanoq qimmit aallartinneqartarnersut minnerunngitsumillu qanoq unissarneqartarnersut.

Biilertarnerup silarsuaanisut pikkorissarneq misilitsinnermik naggaserneqartassaaq tamatumalu ilinniartut qimussersinnaanermut allagartartaartassapput.

Taamatut ingerlatsilersoq tassaavoq Oqaatsuni akunnittarfik Hotel Nordlys "Greenland Dogsledge Academy"-mik taallugu ingerlatsiniartut nunaqarfimmi aalisartut allallu qimussernermik soqutigisaqarluartut suleqatigalugit pikkorissaasarniartoq.

Qimussillaqqissumik ilitsersuisumik qimusseqateqartassapput pisariaqalersillugu taanna aatsaat ikiuuttassalluni. Pikkorissareernerup kingorna ilinniartut takinerusumut qimussernissamik pisisinnaapput Ilulissat Kangerluani majoqqarasaartumi qimussersinnaanermut ilinniakkatik misilittaatigalugit.

Takornariaq qimmit nillaasarnerannik qimussillu sukkaatsut pikunaagissagunikkit qamuteralannik attartornissamut periarfissaqarput taakkulu saniatigut sisoraatinik attartorlutik Oqaatsut eqqaanni angalaarsinnaallutikk, Ilulissat Xpress-imiit Ole Dorph taama oqaluttuarpoq, taannalu nammineq takornarianut neqeroorutaalersussamik inerisaaqataasimavoq.