Qimusseratik snescootererput
Danmarkip, Nunarput peqatigalugu Canadamiut sakkutuuisa issittoq pillugu suleqatigiinnerat, ukiunilu kingullerni pitsanngoriartuinnavissimasoq ersersinniarlugulusooq Tunup avannaarsuani sungiusaqatigiittoqarpoq.
Kangilinnguani Sakkutooqarfiup umiarsuaasa naalagaat sungiusaqatigiinnermilu pisortaasoq, taama Michael Hjorth paasisitsivoq.
- Canadami sungiusarnermi, Nunalivumik taagukkamik 2010-mi pisumi, nakkutilliisut Siriusikkut qimusserlutik peqataapput. Canadamiut rangersit Kalaallit Nunaanni sungiusaqatiginissaat qangali kissaatigisarsimavarput, tassalu tamanna piviusunngorluni sungiusarneq Danebrogip Mestersvigillu akornanni maanna pivoq, Michael Hjorth oqarpoq.
Canadamiut alapernaarsuisarnerminni qamuteralaat atortarpaat, taakkulu ilinniarniarnissaat ilaatigut siunertaasoq, Michael Hjorth oqarpoq.
- Aallerinanngitsumik pitsaasumillu qamuteralannik ingerlatsisussanik, siunissamilu ilitsersuisinnaasunik sungiusartitsivugut. Canadamiullu taakkuupput qamuteralannik ingerlatsinernik sungiusaasinnaasut pikkorilluinnartullu, tassami taakku ukiorpassuanngortuni qamuteralannik atuisuupput, Michael Hjorth oqarpoq.
Ulluni kingullerni Tunumi sila pitsaasimanngilaq, tamannalu pillugu qamuteralaat qamutinik, 300-niik 400-it kiilut tungaanut usisunik ingerlatsiniarneq imaannaasimanngilaq.
- Aput anorilu pissutaallutik qamuteralannik ingerlatsiniarneq ajornakusoortitsilaarsimavoq, sapaatip akunneranili kingullermi sila pitsanngormat nuannisaqalutilli. Aputeqaqaarli taannalu iluamik manngertissimanani, taamaattumik sungiusarneq unamminaqaaq.
Kangilinnguani Sakkutooqarfiup umiarsuaasa naalagaat sungiusaqatigiinnermilu pisortaasoq, Michael Hjorth nassuiaavoq.
Sungiusaqatigiinneq marsip 16-ata tungaanut pissaaq, sungiusarnermi naggasiutigineqassalluni, piviusuusaartitsilluni ilisimasassarsiortunik tammaaneqartunik ujarlerneq.
