Qimmiutiminnik paarsinerluttut ukioq manna ikinnerupput
- Illoqarfipput Ilulissat assersuutigigaanni qimminik paarsinerluttut ataasiakkaat kisiisa ukioq manna naammattoorpagut, tassalu aasaq kiatseruttornerata nalaani qimmit qilallutik toqusimasut nassaarigatsigit. Suliat annikitsukkuutaat ukiup ingerlanerani nalaattakkagut tassaanerupput qimminik nerisitseqqusinerit, pineqartullu malinnaaviginerini tamarmik aaqqiivigineqartarput. Qimmeqarfiit sisamaasut ukioq manna ornitagut Sisimiut, Kangerlussuaq, Qasigiannguit mannalu illoqarfipput Ilulissat assorsuaq takulluarfigaagut. Sanne Wennerberg unnersiorpoq.
Qimmiutillit uumasut nakorsaannik suleqatiginnikkumanerat tikitani tamarmiusuni maluginiarneqarpoq.
- Assorsuaq qimmiutillit alakkaanissatsinnut ajornasaanngipput, tamattalu, qimmiutillit, qimmilerisut, oqartussaasullu suleqatigiilluarpugut. Tamannalu angalanitsinni assorsuaq oqilisaataavoq, uumasut nakorsaat oqarpoq.
Uumasut nakorsaat marluusut sineriammi qimuttunik qimmeqarfik tamaat nakkutigisaraat.
- Angumerisinnaasagut tamaasa orninniartarpagut, tassami qimuttoqarfik tamaat uumasut nakorsat marluinnaalluta suliffigaarput, taamaammat angumerisinnaasagut killeqarput, kisiat tassa tulleriiariniarsarisarpugut illoqarfiit nunaqarfiillu tulleriiaarlugit sapinngisaq tamaat orninniartarlugit, Sanne Wennerberg oqarpoq.
