Qimmit ikiaroornartulerisartut tallimanngormat nassaaqattaartut
Qimmit ikiaroornartulerisartut naamaniallaqqissusertik iluaqutsiullugu, ikiaroornartoq 1 kiilu 311 grammimik oqimaassusilik tallimanngormat nassaaraat.
Ikiaroornartumik nassaaqattaarneq aallartippoq, timmisartoq Kangerlussuarmeersoq tallimanngormat ulloqeqqata missaani mimmat. Tassani arnaq 52-inik ukiulik nassatami akornanni 777 gramimik ikiaroornartumik nassataqartoq paasineqarpoq.
Arnaq ikiaroornartumik eqqussuisartumik sullissilluni ikiaroornartumik eqqusseriaraluarpoq, tigusarineqaramilu sullissami aqqa nalunaarutigaa, taakkulu marluullutik qaammatini pingasuni pineqaatissinneqarsimasunut inissiisarfiimmiittussanngortut, Nuummi politiit ikiaroornartulerisartut pisortaat Finn Jeppesen oqarpoq.
Ullorli taanna aamma allanik nassaartoqaqqippoq.
Angutip 44-nik ukiullip kuffertia soqutiginartillugu, qimmip aamma uniffigimmagu, misissuiffigineqaraluarmat nassaarfigineqanngilaq. Nassataqannginnera qulakkeerniarlugu angut tarrarsuisarfimmut assilisikkiartorneqarpoq, tassanilu angut ikiaroornartumik 306 gramimik aqajarormioqartoq paasineqarpoq. Angut taanna maanna 30.000 koruuninik akiligassinneqareerpoq, eqqusseriaqqissagaluarunilu pineqaatissinneqarsimasunut inissiisarfimmiittussanngussalluni.
Anngiortumilli eqqusseriarnerit ulloq taanna tassunga killeqanngillat, tassami politiit qimmii Nuummi allakkerisarfimmiinnerminni aamma nassaarput. Tassani poortukkat marluk ikiaroornartumik imallit nassaarineqarput - siulleq ikiaroornartumik 173 gramimik imalik aappaalu 55 gramimik imalik.
- Katillugit nassaarineqarput 1 kiilu 311 gramillu! Taamatut nassaarluareernermikkut qimmit akissarsiaralugu saanermik neqitalimmik angisuumik akissarsitinneqartariaqaraluarput, aammami pitsaasunik nerisinneqarput nersualaarneqarluarlutillu, Finn Jeppesen taama oqarpoq.
