Qimmit chip-ilersinnaavat
Illoqarfimmi Nuuttut angitigisumi qimmit qitsuillu angerlarsimaffimminiit qimaasut Uumasut Ikinngutaannut eqqunneqaraangamik ilaatigut piginnittuisa nassaariniarnerat ajornakusoortarpoq. Piginnittut nassaarineqanngikkaangata qimmit qitsuillu toquinnarneqarneranik kinguneqarsinnaavoq. Qitsuutillit qimmiutillillu tamarmik uumasuutitik Kommuneqarfik Sermersuumut nalunaarutigisartuuppatigik tamatuma ajornartorsiutaanera annikinnerulissagaluarpoq.
- Qitsuutillit qimmiutillillu Innutaasunut Sullissivimmut saaffiginnissinnaapput, Kommuneqarfik Sermersuumi qimmeqarnermut suliaqartunut pisortaasoq Sofie Ahn taama oqarpoq.
Qimmit qitsuillu Nuummi amerlassusaat kommunip ilisimaqqissaanngilaa. Qimmeqarnermulli suliaqartunut pisortaasup Nuummi qimmit qitsuillu nalunaarsorlugit aallartereerpai.
- Imaanngilaq paasiniarniaripput inuit kikkut qimmeqarnissamut qitsuuteqarnissamullu akuersissuteqarnersut, tamanna siunertarinngilarput. Paaserusuinnarpagut qimmit qitsuillu qanoq amerlatiginersut. Taamaattumik inuit uumasuutitik nalunaarutiginiarunikkit kommunimut saaffiginninnissartik ilerasuutigisariaqanngilaat, Sofie Ahn taama oqarpoq.
Sofie Ahn uumasunut peqqissaasuuvoq, taamaattumillu uumasut chip-imik ikkussiffigisinnaasarpai. Uumasoq chip-ilersimasoq nassaarineqaruni qarasaasiaq atorlugu chip-ia misissorneqarsinnaavoq, taamaalilluni piginnittua ajornanngitsumik paasineqarsinnaassalluni.
Qimmit perlerulernissaat pinaveersaartinniaraat
Nuummi qimmit qitsuillu nalunaarsorneqarnissaat aamma pisariaqarpoq perlerornermut akiuussutissamik kapineqartarnissaat inatsisitigut piumasaqaataammat. Kommuneqarfik Sermersuumi sulisut qassit akiuussutissamik kapineqartussaanersut paaserusuttarpaat. Akiuussutissalersuinermi aningaartuutit Namminersorlutik Oqartussaniit tapiiffigineqartartut tunniunneqartarput.
Qimmeq qitsulluunniit perlerornermut akiuussutissamik kapineqarsimanngitsoq ulorianarluinnarpoq
- Qimmeq akiuussutissamik kapineqarsimanngikkuni illoqarfimmilu perlerortoqalerpat inunnut kingunerlutitsisinnaavoq, qimmeq perlerortoq inunnik tunillaasinnavoq allaat toqumik kinguneqarsinnaasumik. Taamaattumik pingaaruteqartorujussuuvoq qimmit qitsuillu akiuussutissamik kapitsissimanissaat, Sofie Ahn taama oqarpoq.
Uumasunut peqqissaasup Sofie Ahnip qimminik qitsunnillu akiuussutissamik kapuiniarpoq. Tamanna pissaaq nunarsuaq tamakkerlugu perlerornermut ulloritinneqartoq septembarip 28-at iluatsillugu.
