Qimmit assartornerinut kommunit tapeeriaasii assigiinngeqaat

Qaasuitsup Kommuniani qimussertartut Avannaata Qimussersuanut annguttut qimmiisa qamutaasalu assartorneqarnissaat kommunimit tapiiffigineqarsinnaasut, Tunumi qimussertartut peqatigiiffii Kommuneqarfik Sermersuumit tapiiffiginiarneqanngillat.

Tunumit Avannaata Qimussersuanut peqataatitaqarsinnaajunnaarpoq, Tunumi qimussertartut peqatigiiffiata qimmit qamutillu assartuunnissaannut Kommuneqarfik Sermersuumit tapiiffigeqqulluni qinnuteqataa kommunip piorsaanermut ataatsimiititaliaanit sapaatip akunnerani kingullermi akuerineqanngimmat.

- Pakatsisorujuuusuvugut, Avannaata Qimussersuanut peqataatitaqarsinnaajunnaarluta tallimanngormat ilisimaleratsigu, Justus Uutuaq, Kulusummi qimussertartut peqatigiiffianni, Qamutseq 2011-mi, siulittaasoq oqarpoq.

Qamutseq 2011 Kommuneqarfik Sermersuup piorsaanermut ataatsimiititaliaanut qimmit qamutillu Kulusumit Ilulissanut timmisartumik assartuunneqarnissaannut 450.000 koruuninik tapiiffigeqqulluni ukioq aallartissimalersoq qinnuteqarpoq.

- Qimussertartut pingasuinnaat angalanissaannut akuersisimagaluarutta timersortartorpassuit allat unammiartornissaannut akissaarussimassagaluarpugut, soorlu nunarput tamakkerlugu pissartanngorniuunnernut peqataanissaannut, Mille Søvndal Pedersen, piorsaanermut ataatsimiititaliap siulittaasua oqarpoq.

- Aamma Qamutseq 2011-ip qinnuteqaataa kingusinaartumik tigugatsigu qinnuteqaateqarnermullu piumasaqaatinut naammassinninngimmat akuerinngilarput, piorsaanermut ataatsimiititaliap siulittaasua nassuiaavoq.

- Avannaata Qimussersuanut peqataatitaqartarsinnaanissaq pillugu aningaasat 2013-mut missingersuusiorneqalerpata kissaatitut ilanngutissavarput, Mille Søvndal Pedersen erseqqissaavoq.

Qeqqata Kommunia Sisimiuni qimussertartut peqatigiiffiannut, Qimusseq Sisimiut-nut, immikkut tapiissuteqarnissamut maleruagassaqanngilaq.

Qeqqata Kommunia Qaasuitsup Kommuniatulli timersortartut angalanerinut tapiissuteqarneq ajorpoq, kommunit avannarlersaat timersortartut angalanissaannut 65 procentinik tapiissuteqartarpoq, qamutit qimmillu assartuunneqarnissaat ilanngullugit.

- Kommuni timersortartup inersimasup angalanissaata billettianut 30 procentimik tapiissuteqartarpoq, 18-it inorlugit ukiullit 100 procentimik tapiiffigineqartarlutik, Fali Kleist, Qeqqata Kommuniani sunngiffimmi pisortaq oqarpoq.

Qaasuitsup Kommuniata qimmit qamutillu assartorneqarnissaannut ukioq manna 550.000 koruunit aningaasartuutigissavai. Soorlu qamutit qimmillu Upernaviup nunaqarfittaata ilaanit timmisartuunnerinut 200.000 koruunit aningaasartuutigineqassasut, qamutillu pingasut qimmillu Qeqertamit Saqqamiillu 100.000 koruunit aamma aningaasartuutigineqarniartut

Aajuku Avannaata Qimussersuanut annguttut:

Sisimiut
1. Hanseeraq Olsen
2. Kristian Lundblad
3. Søren Davidsen
4. Marius Inûsugtok’
5. Hans Marius Frederiksen

Kangaatsiaq
1. Kristian Inûgsutoq, Ikerasaarsuk
2. Pavia Siegstad, Kangaatsiaq
3. Anders Petersen, Niaqornaarsuk
4. Ado Sandgreen, Kangaatsiaq
5. Sakarias Siegstad, Kangaatsiaq

Aasiaat
1. Lars Iversen
2. Jakob Stork
3. Kaalertaaq Andersen
4. Otto Brandt
5. Marius Stork

Qasigiannguit
1. Ove Johansen, Ilimanaq
2. Edvard Samuelsen
3. Nukannguaq Samuelsen
4. Haansiaraq Zeeb
5. Jørgen Amossen

Ilulissat
1. Jørgen Kristensen
2. Ville Siegstad
3. Kuunu Markussen
4. John Eliassen
5.  Jakob Skade

Qeqertarsuaq
1. Jonas Lukassen, Kangerluk
2. Nukappi Brandt
3. Kari P. Heilmann
4. Thomas Lukassen, Kangerluk
5. Karl Andersen Broberg

Qeqertaq/Saqqaq
1. Aligot Nielsen, Qeqertaq
2. Mikkel Jeremiassen, Qeqertaq
3. Tittus Broberg, Saqqaq

Upernaviup eqqaamiui
1. Otto Kristensen, Innaarsuit
2. Jonas Kristensen, Innaarsuit
3. Niels Eliassen, Innaarsuit
4. Aron Eskildsen, Tasiusaq
5. William Sakariassen, Nutaarmiut