Qimmit akiuussutissamik kapitissinnaanngorpoq

Nuummi qimmiutillit qitsuutillillu uumasuutimik akiuussutissamik kapitinnissaanut qaammammut ulluni marlunni periarfissaqalerput. Kommuneqarfik Sermersooq taama nalunaarpoq.

Nuummi uumasut nakorsaat namminersortoq maajip qulingani matuvoq. Taamanerniit uumasut nakorsaannik tikeraartoqarnerani taamaallaat uumasut akiuussutissamik kapitissinnaasarsimapput. Aamma uumasut nakorsaat matummat kinguninngua Kommuneqarfik Sermersuup Nuummi qimmilerisua atorfimminit tunuarpoq. Taassuma aarleqqutigaa ilungersunarluinnartumik inissisinnaanissani qimmimik ajoqusersimasumik siumuissaguni. Politiit aamma nalunaarutigereerpaat uumasunik toqutsisarnissaq suliassamittut isiginngikkitsik.

Maanna tassa qimmiutilli qitsuutillillu piffissamik inniminniisinnarlutik perlerornermut, qimmit nappaataannut, tingullunnermut aamma parvovirusimut akiuussutissalersinnaanngorpaat.

Kommuneqarfik Sermersooq Nuummi qimmilerisussamik aamma atorfinitsitsivoq Uumasut ikinngutaat suleqatigalugu. Taassuma suliassarilerpaa qimmit qitsuillu angalaannartut katersornissaat Uumasut ikinngutaasalu uumasunut inissiisarfianut inissittassallugit. Uumasut akiuussutissinneqarsimanermut uppernarsaateqanngitsut toqunneqartassapput piginnittumut akiligassanngortinneqartussamik.

Kommuneqarfik Sermersuumit aamma qimmiutillit kajumissaarneqarput qimmit pitussimatillugit pisuttuaqatigineqartassasut anaallu oqqunneqartassasut.