Qimmit akiuussutissalernissaannut piumasaqaammit immikkut akuersissuteqarneq sivitsorneqartoq
Tamanna nunatta avannaani kitaanilu qimmeqarfiit avataani qimmiutilinnut atuuppoq.
2019-ili qimmit taakku kapitinngitsoortinnissaannut periariarfissaq kingulliuvoq.
Qimminik piginnittut qimmiminnik qimmit nappaataannut parvovirusimullu ukiumut pingasoriarlutik akiuussutissamik kapititsitsisarnissaat januaarip aallaqqaataat 2017-imili inatsisitigut piumasaqaataasimavoq. Tamatumalu kingorna ukiut pingasukkaarlugit kapitittassallutik.
Inatsit avannaani kitaanilu qimuttoqarfinnut pingaartumik tunngavoq, qimminullu sumiiffinni aarlerinannginnerusumiittunut tassa illoqarfinni nunaqarfinnilu qaasuitsup killeqarfianiittunut immikkut akuersissummik qinnuteqarnissaq 2017-imi 2018-imilu periarfissaasimavoq.
AAMMA ATUARUK Akiuussutissamik kapisisimanermut uppernarsaateqassasut
Tamannalu tassa maanna sivitsorneqarpoq, taamaalillunilu immikkut akuersissummik qinnuteqarnissaq 2019-ip naanissaanut suli periarfissaavoq. Tamanna periarfissaq ukioq manna kingulliuvoq.
Piginnittulli qimmitik qimmit nappaataannut parvovirusimullu 2017-imi inatsisip atuutilinnginneranili akiuussutissamik kapitissimasut uppernarsarsinnaassavaat.
Tamatuma saniatigut najoqqutassat malillugit qimmit qitsuillu qimmit perlerornerannut akiuussutissalerneqarnissaat suli inatsisitigut piusssaaffiusoq, UNIO-p maluginiaqquaa.
Kialuunniit uumasunik piginnittup akiuussutissaliinermut meqqiliinermullu piumasaqaatit atuuttut uumasuutimik naammassisimassagaat uppernarsarsinnaassagaa, UNIO-p erseqqissaatigaa.