Qimmip niaquata saarnga pisoqarsuaq nassaaraat
Qimmip niaquata saarnga russit itsarnisarsiuut, Sibiriami qangattami nassaaraat. Niaquata saarngata ilusaa kalaallit qimuttuinut assinguvoq, taamaattorli kigutai annerujussuullutik, tamannalu amaqqunik Europameersunik eqqarleqarneranut takussutissaasoq oqaatigineqaluni, BBC-mi tamanna allaaserineqarpoq.
Itsarnisarsiuup Susan Crockfordip oqaatigaa, niaqqup saarngata oqaluttuarisaanermi qimmeqaqqaartalernermeersuunissaa ilimanartoq.
Taamaattorli itsarnisarsiuut nassaavat taanna qimmit ullutsinni qimuttorineqartut siuaasarigunanngilaat. Sermersuaqarneranimi kingullermi qimmit Sibiriamit tammarput, tamaani najugallit nuuttaqattaarnerujussuat tamatumunnga pissutaasutut itsarnisarsiuut oqaatigaat.
Qimmit nujuitsut siulliit nunaqarfigisami eqqakkanik saliisutut uumasunullu kiisortunut ersisaarutitut annerusumik atorneqarsimapput.