Qillerivik Greenpeacemit qaqiffigineqartoq
Uuliamik qillerivik Leiv Eiriksson Ocean Rigimit pigineqartoq, pilersaarutit malillugit aasamut Nunatta sineriaani assigiinngitsuni sisamani qillerilersussaavoq.
Qillerivimmik tiguaasunut ilaasoq, Helena Hansen oqaluttuarpoq tiguaanerminni taquaqarluarsimallutik, naatsorsuutigalugu sivisuumik taamaaliussallutik.
- Nilleqaaq aammalu anorlerluni. Qilleriviup qillerivittaata ataaniippugut. Naak nilleraluartoq misigisaq nuannaarutigaarput. Tasasami nalunngilara taamaaliornera iluaqutaasussaasoq siunertaqarlunilu.
Greenpeacemi silaannaap pissusaanik sammisaqartoq, Jon Burgwald isumaqarpoq uuliasiornermi avatangiisinut sunniutigisinnaasaasa nalilersorneqarnera Cairn Energymit isumannanngitsumik suliarineqarsimasoq.
Cairn Energy-p oqaatigaa Norskit isumannaallisaanermut iliuusaat atorneqartut. Cairnilli pilersaarutaat qimerlooraanni tassani takuneqarsinnaavoq, kemikaliat atorneqartut qanorlu annertutigisut qillerinermi atorneqartussaasut, taava naatsorsuutigineqarsinnaavoq kemikaaliat 9.000 tons immamut maqitinneqartussaasut. Taamatullu aniatitsinerit Issittumi sumiluunniit ulloq manna tikillugu misissorneqarsimanngisaannarput. Immamullu maqitinneqartut nunami atoqqitassatut pilersaatutaanngillat tassalu taakku aalisakkunut aallanullu ulorianartorujussuupput. Jon Burgwald taama oqarpoq.
Jon Burgwald aperaarput avatangiisinik illersuiniaqatigiiffiup tiguaanerminni suna anguniarneraat, taannalu ima akivoq:
Tusarniaatitsineq suli naammassinngilaq aammalu suli Naalakkersuisut akuersissummik tunisinngillat. Norskit isumannaallisaannermut iliuusaat Cairnimit atorneqanngillat, neriuutigaarpullu tamanna tunngavigalugu isumannaallisaanermut piumasaqaatit Naalakkersuisunit qimerlooqqinneqarumaartut. Jon Burgwald akivoq.
Tassalu Greenpeaceip anguniagaa tassaavoq Nunatsinni Naalakkersuisut aammalu innuttaasut qanoq pisoqarnissaanik paasisaqarluarnissaat.
Jon Burgwald aperaara, ilisimaneraa uuliasiorneq Nunatta aningasaqarneranut isumalluutaasoq annertooq aammalu tamanna eqqarsaatigisimaneraa, taannalu ima akivoq:
Kalaallit Nunaata aningaasaqarneranut uulia isumalluutaalluartuusoq ilisimavarput. Kisianni una eqqaamaneqassaaq, Cairni uuliamik nassaaraluarpat aatsaat ukiut 20-it qaangiuppata Kalaallit Nunaannut aningaasanik isaatitsineq malunniuteqalersussaammat. Cairni uuliamik nassaaraluarpat ajutoornermillu tamanna kinguneqarluni, taava ajutoornermit ulloq siulleq aallarnerfigalugu aalisarneq piniarnerlu annertuumik eqqorneqartussaavoq. Tamanna Kalaallit Nunaata aningaasaqarneranut iluaqutaanavianngilaq. Taamaattumik maannagaaq Kalaallit Nunaata qulakkeertariaqarpaa nunap aningaasaqarnerata ajoquserneqannginnissaa.
