Qillerinerit sunniutaat pillugit ilisimasat killeqarput
Nalunaarusiaq imartooq, USA-mi nunami namminermi pissutsinut ministerimit Ken Salazarimit siorna suliakkiutigineqartoq, aalajangersimasunut tunngasunik amigaateqarpoq.
Soorlu uuliamik maqisoortoqarnerani silamut immamullu qanoq sunniuteqarsinnaanera pillugu paasissutissanik pingaarutilinnik katersaqanngilaq.
Issittumi silap pissusaata allanngornera pillugu paasissutissat amerlanerusut aamma amigaataapput.
Uumasut sikumi uumasuusut, soorlu puisit aarrillu uuliasiortoqarnerani nipiliornernit qanoq sunnerneqarsinnaanerat pillugu tunngaviusumik ilisimasariaqakkat ilisimaneqanngillat.
Nalunaarusiami suleqataasut ilaasa, Brenda Piercep, USA-mi ujarassiuutut atorfillip, paasissutissanik amigaateqartoqarneranik oqartoqarnera isumaqatigaa.
- Suliap assigiinngitsunut tunngasortaatigut, arlalitsigut siuariartoqaraluartoq, issittoq pineqartillugu, kissaatigineqartutut tamakkiisumik angusaqarsinnaanngilagut, Brenda Pierce nutaarsiassaqartitsivimmut Associated Pressimut oqarpoq.
Taamaattumik issittumi uuliamik gassimillu qillerisoqarnissaannut inuit aarleqqutissaqassanngippata, annerusumik misissueqqissaartoqartariaqartoq, Brenda Pierce oqarpoq.