Julie Ninalu: - Qilanaaqaagut, pissangaqalutalu!
- Utaqqineq ajornerpaavoq. Appikusuppugut, utaqqisinnaajunnaaqqavugut. Qilanaaqaagut, pissangaqalutalu!
Julie Berthelsen, Melodi Grand Priximut Herningimi Boxenimi unnugu pisussamut misiliinissaq sioqqutilaarlugu taama oqarpoq.
AAMMA ATUARUK Unnugu ajugaaniarpugut!
Pinnersarnerit misiliinerillu akornanni tusagassiortunik katersortitsisoqarnerani malugilerpaa nammineq Nina Kreutzmannilu pissangalerlutik.
Ima taasisinnaavutit
Dansk Melodi Grand Prix 2019-imi nunatsinnit aamma taasisoqarsinnaavoq.
1212-imut sms-imik nassiussillutik taasisinnaavutit.
0045-lissanngilat.
Sms-ikkut taasissutissat tassaapput: Sang 1, sang 2, sang 3, sang 4, sang 5, sang 6 , sang 7 , sang 8, sang 9 aamma sang 10.
Peqataasumik ataatsimik ataasiaannarluni taasisoqarsinnaavoq.
Sms ataaseq 1 kr.-eqarpoq, Tusass'-ilinnut 1 kr.-eqassaaq + sms-imut akiliut nalinginnaasoq.
Aamma DR-ip app'ia aasinnaavat tassuunalu taasillutit. App'i akeqanngitsumik aaneqarsinnaavoq taasinerlu akeqanngilaq.
Najoqqutarisat: Tele-Post/dr.dk
- Sorpassuarnik suliaqarpugut, piareersarlutalu sungiusaqattaarpugut. Imaalaarpugut: ’Piareernerpugut!’, Julie Berthelsen oqarpoq.
Naliliisartut: Erinarsuut nr. 7 periarfissagissaarpoq
Erinarsuut 'League of light' periarfissagissaartutut arlalinnit nalilerneqarpoq.
Morten Madsenip, nuannaartorinnittunut nittartakkamik Eurosong.dk-imik 2004-miilli aqutsisuusup, DR naapertorlugu erinarsuutip finalimut ingerlaqqittussat pingasuusut akornanniinnissaa ilimagaa. Aamma Danske Spilimit normu 2-nngortussatut ilimagineqarpoq.
Unammisussalli aperigaanni qulanngilluinnarput.
AAMMA ATUARUK Melodi Grand Prix 2019 KNR-ikkut toqqaannartumik aallakaatinneqassaaq
- Aallaqqaataaniilli upperaarput, sulilu upperalugu, Julie Berthelsen oqarpoq.
Ajugaasaanngikkussimi Tel Avivilianngitsoorlusilu - taava qanoq pissavisi?
- Pakatsissaagut. Naluarput qanoq qisuariassanerluta. Pakatsissallutali qularinngilluinnarparput. Pilereqigattami pakatsissaqaagut, Nina Kreutzmann Jørgensen oqarpoq.
Julie Berthelsenip isumaqatigaa. Ajugaanngikkaluarunimmi inuuneq aamma ingerlaqqittussaavoq.
- Inuuneq ingerlaqqissaaq. Aamma tallimanngorpat tusarnaartitsissussaavunga. Soorunami inuuneq ingerlaqqissaaq, kisianni... Pilereqigatta allatut oqarsinnaanngilagut ajorsassagutta pakatsissaqaluta, KNR-imut oqarpoq.