Assi: Agnete Schlichtkrull/DR

Nina Kreutzmann: Unnugu ajugaaniarpugut!

- Ajunngeqaagut! Nina Kreutzmann Jørgensen tallimanngornermi ullup qeqqata missaani taama oqarpoq. Nina Kreutzmann Jørgensenip Melodi Grand Prix Herningimi Boxenimi aallartippat Julie Berthelsen erinarsoqatigissavaa.

Nuannariinnarlugulu peqataanngillat. Danske Spilip arnat marluk normu 2-nngornissaanut eqquiniaatitsissutigai.

- Ajugaarusuttorujussuuvugut. Neriuppugut ajugaassalluta. Tamanna ullormit siullermit kissaatigilerparput. Aallartikkattali Israelimi tusarnaartitsisarfimmiinnissarput takorloorparput, Nina Kreutzmann Jørgensen oqarpoq.

Melodi Grand Priximi nunat tamalaat akornanni ajugaaniutivinnissaq Tel Avivimi ingerlanneqartussaavoq.

- Assoroornerput malugisinnaavarput. Ajunngilarli. Tamanna Juliemit uanniillu annerungaatsiarpoq. Ikinngutigiittut maaniippugut, kisianni aamma Nunarput Danmarkilu sinnerlugu peqataalluta. Uagutsinnut pingaaruteqarpoq.

Ima taasisinnaavutit

Dansk Melodi Grand Prix 2019-imi nunatsinnit aamma taasisoqarsinnaavoq.

1212-imut sms-imik nassiussillutik taasisinnaavutit.

Sms-ikkut taasissutissat tassaapput: Sang 1, sang 2, sang 3, sang 4, sang 5, sang 6 , sang 7 , sang 8, sang 9 aamma sang 10.

 

Peqataasumik ataatsimik ataasiaannarluni taasisoqarsinnaavoq.

 

Sms ataaseq 1 kr.-eqarpoq, Tusass'-ilinnut 1 kr.-eqassaaq + sms-imut akiliut nalinginnaasoq.

 

Aamma DR-ip app'ia aasinnaavat tassuunalu taasillutit. App'i akeqanngitsumik aaneqarsinnaavoq taasinerlu akeqanngilaq.

Najoqqutarisat: Tele-Post/dr.dk

Sooruna pingaaruteqartoq?

- Ukiorpassuarni Danmarkilu ataatsimoortuuvugut. Kisianni aamma Nunatta nunarsuarmiunut ilaanissaa pingaaruteqarpoq. Nunatsinnut tunngasunik ilisimasaqanngitsunik naapitsigajuppugut - ilaataluunniit Kalaallit Nunaat piunersoq ilisimanngilaaq: “Greenland, isn't city in Denmark?”, tassa “Kalaallit Nunaat Danmarkimi illoqarfiunnginnami?”, taama oqartunik tusarnikuuvunga. Danskit Melodi Grand Prixeqarnerani ajugaalluta Tel Avivimut peqataassagutta Nunarpullu oqaluttuaralugu taama tamanna angisoorujussuussaaq.

Ilisimasaqannginneq isummallu pigiliutiinnakkat imminnut ataqatigiipput, tamannalu erinarsuummik ‘League of Light’-imik atuillutik sassarnerannut tunngaviuvoq, tassanilu tuluttut kalaallisullu erinarsorput. Danskit Melodi Grand Prixeqartarneranni ukiuni 40-ni aatsaat kalaallisut atuisoqassaaq.

- Isummat pigiliutiinnakkat tamarmik ilisimavagut. Oqaatigisariaqanngilakkaluunniit. Isummat taakku Danmarkimi Nunatsinnilu atorneqartarput. Ilisimanninnermik pilersitsissaagut. Immitsinnut ilisimasaqarfiginerugutta immitsinnut paasisinnaanerussaagut - taava aamma imminut tikkuartuutiinnannginnissaq oqinnerussaaq.

Taava imaappoq aqagumut suliassarujussuaqarpusi?

- Suliassarujorujussuuvoq! Tamanna ilisimalluinnarparput. Marluunerput nuannaarutigaarput. Assagut imminut tigummisinnaavagut imminullu paarisinnaalluta. Tassa ataatsimoorneq: Imminut paarineq ikioqatigiinnerlu.

- Kalaallit Nunaanni kulturimi allarluinnarmiittugut oqaatsinillu danskisuunngitsunik atugaqartugut oqaluttuariniarparput - imaanngilarli ataatsimoorsinnaanngitsugut. Naak assigiinngitsorujussuugaluarluni ataatsimoortoqarsinnaavoq. Anersaakkut nassataqartorujussuuvugut, nassatatsinnik tigusiniarsarivugut aammali nutaaliamik nassataqarniarluta. Julielu marluulluta akusaavugut, Nina Kreutzmann Jørgensen oqarpoq.

Dansk Melodi Grand Prix KNR1-ikkut toqqaannartumik ullumi nalunaaqutaq 16.00 malinnaaffigisinnaavat. Aamma maani knr.gl-imi unnuup ingerlanerani malinnaasinnaajumaarputit.

League of light (Official music video)

 

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat