Qilalukkat qernertat neqaat Danmarkimi arsaarinnissutigineqartartut
DR Nordjylland taama allaaserisaqarpoq.
Jyllandip avannaani akileraaruserisut qilalukkap qernertap neqaanik nassiussat 116-it siorna arsaarinnissutigaat.
Neqillu annaaneqarnerisa saniatigut qerisunik tigusisussaq politiinit mianersoqqussutitut taaneqarsinnaasumik tunineqartarpoq.
- Avammut nassiuteqqusaanngillat aamma Danmarkimut eqquteqqusaanngillat, Naturstyrelsimi uumassusilinnik ilisimatooq Niels Nielsen taama oqarpoq.
Inerteqquteqarneq 2006-imiilli atuutilerpoq, arsaarinnissutigineqartartulli siorna sisamariaatinngoriasaarput, tamannalu pissutigalugu Naturstyrelsip Nunatsinni Namminersorlutik Oqartussat attavigisimavaat.
AAMMA ATUARUK Mattaat unioqqutitsitsilluni nassiunneqartartut amerliartorput
- Oqaloqatigaagut, Danmarkimullu qilalukkap qernertap neqaanik nassiussisoqannginnissaa qulakkeerniarlugu nassiussisarfinni paasissutissiineq pitsaanerulersinneqartoq oqaatigaat, DR Nordjyllandimut taama oqarpoq.
Qilalugaq qernertaq nungutaanissamut aarlerinartorsiortinneqanngilaq, Danmarkimili akileraaruserisut qilalukkanik qernertanik piujuaannartitsinissaq tunngavigalugu piniartoqarnera erseqqissumik oqaatigisinnaanngilaat, taamaattumillu neqaata Nunatsinnit Danmarkimut eqqunneqarnissaa inerteqqutaalluni.
Kalaallilli Danmarkimiittut qilalukkap qaqortap tikaagulliullu neqaannik annikitsukkuutaanik nammineq nerisassaminnik nassiussarsisinnaanerat inerteqqutaanngitsoq, DR Nordjylland taama allaaserisaqarpoq.
