Mattaat unioqqutitsitsilluni nassiunneqartartut amerliartorput

Qilalukkat qernertat mattaanik neqaanillu nunanut allanut nassiussineq inerteqqutaavoq. Taamaakkaluartoq Aalborgip umiarsualiviani akitsuuserisut ukiup matuma ingerlanerinnaani 50-riarlutik arsaarinnipput.

 

Arsaarinnissutit ukiuni kingullerni amerliartortut, Danmarkimi pinngortitamut pisortaqarfimmi uumasulerituup oqaatigaa:

- Qilalukkat qernertat neqaanik Danmarkimut eqqusseriartunik arlaleriarluta ukiuni kingullerni arsaarippugut. Ukioq mannaannarlu 50-it missaat arsaarinnittoqarsimasoq takusinnaavara, Niels Kurt Nielsen oqarpoq.

Taassuma aamma oqaatigaa, malittarisassat sukaterneqarnerisigut, nunatsinni najugallit qilalukkap qernertap mattaanik neqaanilluunniit nunanut allanut 2004-imili nassiussisinnaajunnaartut. Taamaammat kalaallit mattammik Danmarkimut nassiussisartut amerlasuut malittarisassamik tamatuminnga suli unioqqutitsisartut Niels Kurt Nielsenip oqaatigaa. Malittarisassalli tamatuma ilisimaneqannginneranik peqquteqarsoraa:

- Inuit inatsimmik ilisimanninnginnerat ilimagisaratsigu arsaarinninnermi akiliisitsinissarput siunertarineq ajorparput. Kisianni inuit qilalukkap qernertap neqaanik mattaanilluunniit arlaleriarlutik Danmarkimut eqqusseriarsimappata, taava akiliisitsisarpugut. Kisianni tassa qilalukkap qernertap neqaanik nassiussarsisimagaanni, taava mianersoqqummik pisoqartarpoq nassiunneqartorlu arsaarinnissutigineqarluni, Niels Kurt Nielsen oqarpoq.

Kisiannik akitsuuserisut mattammik siornatigut naammattuuigaangamik, arferup sorliup mattagineraa siornatigut immikkoortissinnaasarsimanngilaat.  Massakkulli immikkut ilisimasalimmik, mattannillu assigiinngitsunik immikkoortitsisinnaasumik sulisoqalersimapput. Taamaattorli nassiussarsisoq eqqortumik pineqanngitsutut misigiguni maalaaruteqarsinnaavoq:

- Eqqussiniartup nalunngikkuniuk, nassiussaq qilalukkap qernertap neqerinngikkaa, taava maalaaruteqarsinnaavoq nassiussarlu misissorteqillugu, Niels Kurt Nielsen oqarpoq.