Qilalugarniaq kilisaammit ikiorneqartoq ujaasinermik aallartitsisoq

Aasiaat kitaata avataani umiatsiaq tammartajaartoq kilisaammit qaqinneqarpoq - tamatumalu kingorna Issittumi Sakkutooqarfik imaatigut ujaasinermik aallartitsigaluarpoq.

- Tamanna aallartippoq kilisaatip angisuup, Polar Nataarnap, umiatsiaaraq Aasiaat kitaata avataani ikioreeraalu. Umiatsiaaraq orsuerutigajassimavoq, umiatsiamillu piginnittup sumiinnerluni nalusimavaa, Kalaallit Nunaanni Politiit pigaartuisa pisortaat, Søren Bendtsen, taama oqaluttuarpoq.

Umiatsiaaqqamik piginittoq tamaani qilalugarniarpoq, ikiorneqarmallu paasineqarpoq umiatsiaaraq Aasiaat kitaata avataani kisimiilluni qilalugarniarsimanngitsoq.

Politiit: Ajorluinnartumik pisoqarsimasinnaasoq

Piniartormi oqaluttuarsimavoq imartami tamaani aamma umiatsiaaraq alla qilalugarniartoq.

Taamaammat umiarsuit alapernaarsuutit marluk, Triton aamma Lauge Koch, Aasiaat tungaannut ujaasiartortinneqarlutillu annaassiniariartortillugit aallartinneqarput.

- Umiatsiaaqqalli aappaa nammineerluni Kangaatsiamut apuussimavoq, Søren Bendtsen oqarpoq.

Polar Nataarnarlu umiatsiaaqqap ikiorneqartup qanittuaniissimammat iluatsitsinerusoq, taanna isumaqarpoq:

- Ajorluinnartumik pisoqarsimasinnaangaluarpoq. Ujarneqartullu sumiiffii ilisimanngikkaanni imartaq isorartoorujussuaq ujaasiffiusussaangaluarpoq . Aamma sila ersernerluppat. Taamaammat umiatsiaaqqap aappaanik ikiuisinnaasumik kilisaammik eqqaaniittoqarsimammat iluatitsineruvoq, Søren Bendtsen oqarpoq.