Qilalugaq russit kilitsissiaannit sungiusarneqarsimangatinneqartoq allamik siunertaqartoq
Qilalugaq qaqortaq tv-kkut saqqummiunneqareersorlu, russillu sakkutuuinit sungiusarneqarsimassangatinneqaraluartoq, Norgemiut 'Hvaldimirimik' taaguusersimavaat, tassa Ruslandip præsidentiata Vladimir Putinip atianut assingungajattumik atsersimallugu.
Norgemilli aviisi Fiskeribladet allaaserisaqarpoq, qilalugaq qaqortaq pineqartoq allaaserinnittumit ilisarineqarsimasoq. Qilalugaq qaqortaq "Semjonmik" ateqarpoq - meeqqanullu tarnimikkut napparsimasunut katsorsaanermi atorneqartarsimavoq, Ruslandillu kangianeersuulluni.
AAMMA ATUARUK Norgemi aalisartut qilalukkamit qaqortamit qaninngoorneqartut
Allaatiginnittartup Morten Vikebyip uumasuusivik Norgep killeqarfiata eqqaaniittoq ilanngutassiariartorlugu 2018-imi tikeraarpaa.
- Taamani videuliarineqartumi takuneqarsinnaavoq qilalugaq pineqartoq katsorsaanermut atatillugu atorneqartartoq. Taamaammat taama nujuitsiginera tupinnarpallaanngilaq, Morten Vikeby oqarpoq.
Qilalukkap Semjonip anuusaleriarlugu umiatsiamik meeqqat ilaaffigisaannik kalitsinneqartartoq aamma oqaluttuaraa.
Qilalukkallu qaqortap russinit sakkutooqarnikkut atorneqarunannginnera Norgemi aalisarnermut pisortaqarfimmeersut eqqissiallaatigaat.
- Kilitsissianit sorsunnermilu atugassatut takorlooraluaratsigu, sunaaffali inunnut ajunngitsuinnarmik siunertaqartoq. Paasillugu assut nuannerpoq, Norgemi aalisarnermut pisortaqarfimmi nakkutilliisoq Jørgen Ree Wiig NRK-mut taama oqarpoq.
