Qeqqata Kommuniata meeqqat atuarfiat nukittorsalerpaa

Meeqqat atuarfiannit soraarummeertut tallimaagaangata pingasut ilinniakkamik aallartitsineq ajortut, Atuarfitsialak qiteqqunnerani nalilersorneqarmat taama inerniliisoqarpoq. Tamatuma allanngorteriarnissaa Qeqqata Kommuniata unammilligassatut tiguaa taamalu siunniullugu ilinniakkamik aallartitsinngitsoortartut ikilisarneqarnissaat.

Meeqqat atuarfianni piginnaasat qaffasarlugit Qeqqata Kommunia upernaaq aallartippoq. Suleqatigiit killiffitsik kommunalbestyrelsemut saqqummiuteqqammerpaat sulili naammassiniagassat arlaqarput.

- Aalajangiunnikuuarput alloriarnerit annikitsunnguakkaarlugit ingerlaniarluta taamaasilluta qulakkeerniassagatsigu suliassat naammassinissaat. Tassami suliassaq annertoorujussuanngorlugu aallartikkaluaraanni unittoornissaq qaninneruvoq, Qeqqata Kommuniani ilaqutarinnut atuarfeqarnermullu  immikkoortumi pisortaq Vibeke Møller Jensen KNRimut oqarpoq.

Ilaatigut nukittorsarniarneqartut ilagaat atuarfeqarfiup ilaqutariinnullu immikkoortoqarfiup qaninnerusumik suleqatigiinissaat. Tamanna siunniunneqarpoq meeqqat ikiorneqartariaqartut siumorneqaraangata pilertortumik ikiuiniartarnissaq qulakkeerniarlugu.

- Atuarfitsialak qiterpaarnerani nalililisoqarmat paasineqarpoq atuarfimmiit soraarummeertorpassuit ilinniakkamik aallartitsineq ajortut. Kommunimi immikkoortoqarfiit qanimut suleqatigiinnerisigut qulakkeerniarparput meeqqap pitsaanerpaamik atuartinneqarnissaa, Vibeke Møller Jensen oqarpoq.

Meeqqeriviit aamma qaninnerusumik suleqatiginiarneqarput meeqqat pitsaanerpaamik atuarfimmi aallartittarnissaat qulakkeerniarlugu. Suliarlu tassa kommunalbestyrelsep ataatsimiinneri tamaasa nassuiaatigineqartassaaq.

- Oqareernittut aatsaat upernaaq aallartippugut aammalu maanna takusinnaavarput suliaq aappaagu aamma ingerlaqqittariaqartoq. Sulissaqarfik taanna annertoorujussuuvoq piffissarlu taama sivikitsigisoq atorlugu allanngortitsineq ajornaqaaq. Oqareernittut allornerit annikitsunnguakkaarlugit ingerlavugut anguniagaraarpullu Qeqqata Kommuniani meeqqat atuarfiata nukittorsarnissaa, Vibeke Møller Jensen oqarpoq.