Qeqqata Kommunianut akiitsullit saqqummiunneqartoortut
Taakkua kukkusoqarneratigut kommuunip nittartagaanut saqqummersinneqarput, kommunalbestyrelsemi aningaasaqarnermut ataatsimiititaliap 2015-imi kingullermeerluni ataatsimiinnissaanut oqaluuserissassat saqqummiunneqarnerinut atatillugulu.
Inuit aqqisigut taallugit, ilaatigut inuuii, illoqarfimmilu najugaat ilanngullugit - kikkut anartarfilerinermut, ulluunerani paaqqinnittarfinnut, atuakkanik atorniartarfimmut, pujoorfinnik paaviaanermut, umiatsiaaqqanik iluarsaassinermut akiligassanullu allanut akiliisimannginnerat nittartakkami ersersinneqartut, aviisi AG taama allaaserisaqarpoq.
Qeqqata kommuniata nittartagaani atuarneqarsinnaasut ilagaat toqusut pigisaannik suliani akiitsut nalunaarsorneqarsimasut allattorsimaffiat aamma innuttaasut akiitsoqartut kikkut isumakkeerinniffigineqarnissaannik Aningaasaqarnermut Ataatsimiititaliami ilaasortat talllimaasut naliliinerat atuarneqarsinnaalluni.
Akiitsorineqartut amerlanerit annikipput, ilaqarpulli...
Akiitsorineqartut ilarpassui amerlavallaanngillat nalinginnaasumik 1000 koruuninik arlalialunnik amerlassuseqarlutik. Ilaqarpulli aamma amerlasuunik akiitsoqartunik. Ilaatigut innuttaasoq Danmarkimi najugaqartoq 150.000 koruunit sinnerlugit Qeqqata kommunianut akiitsoqarpoq.
Akiitsut taakkua pineqartup ukiut qulingajaat ingerlanneranni pilersikkiartuaarsimavai maannali qallunaap nakorsap nakorsatut naliliinera tunngavigalugu naleruutitinneqartussatut ataatsimiititaliamit inersuussutigineqarlutik, aviisi AG taama allaaserisaqarpoq imalu nanngilluni:
- Kukkuneruvoq, kukkuneq ajorluinnartoq, Qeqqata kommuniani borgmesteri, Hermann Berthelsen, aningaasaqarnermut ataatsimiititaliap ataatsimiiinerata kingorna aviisimut AG-mut taama oqarpoq.
Aamma atuaruk Paasissutissanik ingerlatitseqqiisarsimanertik Nukissiorfiit ajuusaarutigaat
Taamaalinerani kommunip nammineq kukkuneq paasisimavaa allakkiarlu ullormut oqaluuserisassaaneersoq nittartakkamit peerneqarluni.
- Allakkiaq ataatsimiititaliami matoqqasumik ataatsimiinnermut tunngasuuvoq, taanna nittartakkami saqqummiunneqartussaanani, Hermann Berthelsen oqarpoq.
- Innuttaasut akiitsoqartut soorunami paasissutissaatimikkut aamma illersorneqartussaapput tamatumani inatsisini aalajangersakkat malittarisassallu ataqqillugillu malippagut, borgemesteri pisumut peqqissimeqqaqisoq, aviisimut AG-mut ilaatigut taama oqarpoq.