Paasissutissanik ingerlatitseqqiisarsimanertik Nukissiorfiit ajuusaarutigaat

Suliaq Ombudsmandimut anngussimavoq, Ombudsmandilli suliaq annerusumik iliuuseqaqqiffiginianngilaa:

Innuttaasut ilaata suliaq pillugu Ombudsmandimut saaffiginnissuteqarneratigut Nukissiorfiit suliaq pillugu ajuusaaruteqarnertik nalunaarutigaat.

Innuttaasummi saaffiginnissuteqarnera aallaavigalugu Ombudsmandip Nukissiorfiit ukioq manna juunimi qinnuigai sullitani innaallagissamut, imermut kiassarnermulluunniit akiitsullit pillugit paasissutissanik kommuninut ingerlatitseqqittarnersut paasissutissiissutigeqqullugu.

Aamma atuaruk Ukiumi nutaami innaallagiaq akisunerulissaaq

Nukissiorfiit tamanna tunuliaqutaralugu Ombudsmandimut ajuusaarutigalugu nalunaarutigaat sullitami akiitsui pillugit kommuninut ingerlateqqittarsimallugit, tamannalu siorna 2014-imi apriilimi aatsaat atorunnaarsinneqarsimasoq, erseqqissaassutigalugulu taamatut periaaseqarneq unitsivinneqarsimasoq.

Paasissutissanik kommuninut ingerlatitseqqiisarneq sullitat akiitsullit taamalu isumaginninnikkut ikiorserneqarnissamik pisariaqartitsisut pillugit ataatsimut suleqatigiinnermut itatillugu pisarsimasoq nalunaarutigineqarpoq.

Paasissutissanik tunniussisarneq pillugu inatsit atuuttoq malinneqartoq Nukissiorfiit erseqqissaatigaat, paasissutissanillu tunniussisarneq pillugu tunaartarisassat suliarineqarsimalernerat ilisimatitsissutigalugu, sulisut qanoq iliornissartik ilisimalerniassammassuk:

- Siusinnerusukkut periaasiusimasoq Nukissiorfiit sinnerlugit ajuusaarutigissavara, paasissutissallu amerlanerusut perusunneqarpata ikiuunnissannut soorunalimi piareersimallunga, Nukissiorfiit pisortaanerat Ombudsmandimut Vera Lethimut ilaatigut taama allaaserisaqarpoq.