Ukiumi nutaami innaallagiaq akisunerulissaaq

Nukissiorfiit akigititai nutaat, Naalakkersuisut decembarip ulluisa 21-anni ataatsimiinneranni akuersissutigineqarput. Akillu januaarip aallaqqaataani atuutilissasut, Nukissiorfiit nalunaaruteqarput.

Illoqarfinni nunaqarfinnilu katillugit 65-ini innaallagissamik pilersuinermi akit 10 oorinik akitsorneqassappat, kilowattimut 3,27 koruuneqalissallutik. Najugaqarfinni taakkunani innaallagissamik nioqqutissiornermi aningaasartuutit isertitanut naleqqiullugit qaffasinnerupput, tassa Nukissiorfiit nioqqutissiornerminni matumani amigartooruteqarlutik.

Innaallagissamut akigitinneqartut appasinnerpaaffiat 3 procentinik qaffassaaq, tassa kilowattimut akigitinneqartoq 1,61 koruuneqalissalluni, assersuutigalugu Nuummi Sisimiunilu innaallagissamik pilersuineq aamma akisunerulaalissalluni.

Upernavimmi ikuallattoornerup kinguneranik qaffaasoqassaaq

Upernavimmi innaallagissiorfiup nunguilluni 2009-mi ikuallannerata kingunerisaanik akigitinneqartut qaffasinnerpaaffiat marloriaatinngorpoq, tamaani isertitarisartakkat innaallagissiorfiup ikuallanneratigut peerummata.

Innaallagissamik Tasiilami pilersuineq 20 procentinik qaffappoq, tassa kilowattimut aamma 3,27 koruuneqalissagami. Imermik nukissiorfimmik aserfallatsaaliuinermut aningaasartuutit naatsorsuutigisamit amerlanerunerat matumani pissutaavoq.

Narsami Qaqortumilu pilersuineq akikinnerulerpoq, tassa kilowattimut akigitinneqartut 2,72 koruunioriarlutik 2,32 koruuneqalissammata.

Ilulissani innaallagissamut akigitinneqartut qaffanneqarput, kilowattimut 2,29 koruunioriarlutik 2,47 koruuneqalissammata.