Qeqqata Kommuniani aqqusinniassamut nuannaartut: kaagisuutileqaagut

Naalakkersuisut tusagassiutinut nalunaarummik Qeqqata Kommuniata pissangalluni utaqqisaanik sapaatit akunneranni kingullermi sisamanngornermi nasiusivoq.

Tassani Kangerlussuarmiit Sisimiunut aqquserniassatut suliniutip avatangiisinut sunniutigisinnaasai pillugit nassuiaat sapaatit akunnerat kingulleq akuerineqartoq nalunaarutigaat.

Tamanna Qeqqata Kommuniani allafimmi nuannaarutaavoq, tassanngaanniillu borgmester Malik Berthelsen (S) tusagaq nuannaarutigalugu sulisunut kaagillissalluni nalunaarpoq.

- Tulluusimaartorujussuuvugut, ulloq naallugu nuannaarpugut, taavalu nutaarsiassaq nuannersoq kikkunnut tamanut unnersiutigerusuttorujussuullutigu, Malik Berthelsen oqarpoq.

AAMMA ATUARUK ASN akuerineqartoq: Kangerluarsuk Tullermut aqqut qanilliallattoq

Taanna aqqusinissaq kommunimi takorniarialerinermut iluaqutaalluassasoq isumaqarami immikkut nuannaarpoq.

Kommunemi nunaminertami illuaqqiornissanut akunnittarfiliornissanullu akuersissummik tunniussereerpoq.

- Kikkulluunniit qinnuteqarusuttut qinnuteqarsinnaapput, borgmesteri oqarpoq.

- Nunaminertat immikkoortut assigiinngitsut marluk hoteliliorfigineqarsinnaasunngorlugit akuerereernikuuarput, aappaalu immaqa nunarsuarmi hotelit isikkiviginnerpaartaattut taaneqarsinnaavoq inissisimaffia kusanangaarmat, Malik Berthelsen naliliivoq.

Inuussutissiarsiornermi siunnersuisoqatigit periarfissaqarluarSorigaat

Arctic Circle Businessip, kommunimi inuussutissarsiortunik siunnersuisoqatigiit namminersortuni, aamma tusakkaminnut nuannaarput.

Aqqusinniassaq kommunimi takornarialerisut takornarianut assigiinngiiaarnerusunik neqerooruteqarsinnaanissaannut periarfissiissasoq, tassanngaanniit naliliipput.

Siunnersuisoqatigiit Arctic Circle Trailip, Kangerlussuup Sisimiullu akornanni qimussiussinermik pisunnermillu aaqqissuussisartup, siusinnerusukkut aningasaliisussarsiorsimanera eqqaavaat.

Aningaasaleerusussinnaasulli aqqusineq naammasseereertinnagu tunuarsimaartut oqaatigaat.

- Tassani aqqusineq soqutigisorujussuuaat oqarlutik; ’aqqusineq taanna iluatsissinnaasuugussiuk iluamik oqaloqatigerusussavassi sumut ingerlassanerluta.’

- Taamaammat suliassaq annertulaartoq aatsaat aallartilerpoq, pissanganartorujussuuvoq, Arctic Circle Businessimi takornariartitsiffissarsiornermi pisortaq Jesper Schrøder oqarpoq.