ASN akuerineqartoq: Kangerluarsuk Tullermut aqqut qanilliallattoq

Qeqqata Kommunia Sisimiullu Kangerlussuup Sisimiullu akornanni aqqussinniornissamut suliaqarnermi ullumikkut alloriaqqissinnaanngorput.

Naalakkersuisuimmi kommunip Kangerlussuup Kangerluarsuk Tullerullu akornanni aqqussiortoqarnissaanut avatangiisitigut sunniutaasinnaasunut nalunaajaataa akueraat.

ASN avatangiisinut sunniutissanik naliliineruvoq. ASN-imi suliniutip avatangiisinut sunniunerlunneranut suliniutigineqartussat aamma ilaasarput.

AAMMA ATUARUK Sisimiut Kangerlussuullu akornanni aqqusinniornissaq siuariaallattoq

Kangerlussuup Kangerluarsuk Tullerullu akornanni aqqusineq Qeqqata Kommuniata aallartissutiginiagaani siulliuvoq.

Tamatuma kingorna Kangerluarsuk Tullermit Sisimiunut aqqut atassuserniarneqassaaq. Taamaaliortoqarnissaanulli misissuinerit qassiiusut pisariaqarput.

- ASN-mut akuersissuteqarneq manna Kangerlussuarmiit Kangerluarsuk Tullermut aqqusinermut atuuppoq. Taamaattoq Kangerluarsuk Tullermiit Sisimiunut aqquserngup ingerlaqqitsinnissaa sulissutigineqarpoq.

- Aqqusernup ilaata kingulliup sananeqarnissaanut misissuinerit nalilersuinerillu arlallit, Sisimiut eqqaanni imeqarfimmut killeqarfiup ikaarnerani aarlerinaataasunik

paasinarsisitsisussat, suliarineqarnissaat pisariaqarpoq.

- Taamaattumik aallaqqaammut Kangerlussuarmiit Kangerluarsuk Tullermut aqqusinniornissaq aallartinneqassaaq.

Suliffeqarnermut, Ilisimatusarnermut Avatangiisinullu Naalakkersuisoqarfik ASN-imik akuersissuteqarnermi allappoq.

Aqqusinniornermik suliaqarnissaq suliarinnittussarsiuunneqartoq

Qeqqata Kommuniata Kangerlussuup Kangerluarsuk Tullerullu akornanni aqqusinniornissaq maajip qaammataani suliarinnittussarsiuutilereerpaa.

Kangerlussuup Kangerluarsuk Tullerullu – Sisimiut eqqaaniittup akornanni aqqusinniorneq aasamut aallartinneqartariaannaavoq. Qeqqata Kommuniata suliariumannittussarsiuussineq maajip ulluisa 27-ani aallartippaa, aallartinnissaanullu aajangiinissaq tamatuma kingorna naatsorsuutaavoq.

Suliariumannittussarsiuussinermi aqquserngup aappaagu septembarip 15-iani piareereersimanissaa allassimavoq.

Sisimiut Kangerlussuullu akornanni aqqut marlunnut avinneqarpoq. Siulleq, tassa Kangerlussuup Kangerluarsuk Tullerullu akornanni aqqussiornissaq suliariumannittussarsiuuneqartuni siulliuvoq.

Qeqqata Kommuniata Kangerlussuup Aasivissuillu akornanni aqquserniornermut pilersaarummut Sisimiunullu ATV-mut aqqummut 50 millionit koruunit immikkoortereernikuuai.

Aqqusineq tamaat ATV-nut aqqutip ujaraaralersorlugu iluarsaannissaa ilanngullugu 400 aamma 500 millionit koruunit missaannik akeqarnissaa missiliorneqarpoq.