Sisimiut Kangerlussuullu akornanni aqqusinniornissaq siuariaallattoq

Kangerlussuup Kangerluarssuk Tulliullu akornanni aqqusinniornissaq aasaru aallartereersinnaavoq. Qeqqata Kommuniami tamatumunnga suliariumannittussarsiorpoq.

Qeqqata Kommunia nittartakkamini taama allappoq.

Suliariumannittussatut neqerooruteqartut Qeqqata Kommuniani maajip ulluisa 27-anni oqaluuserineqassapput.

Aqqusineq aappaagu septembarip ulluisa 15-ianni piareeqqassasoq, Qeqqata Kommuniata piumasaraa.

Sisimiut Kangerlussuullu akornanni aqqusinissaq immikkoortunut marlunnut avinneqassaaq. Aqqusineq siulleq suliariumannittussarsiuunneqartussaq, Kangerlussuup Kangerluarsuk Tulliullu akornanniissaaq.

Aqqussinniornissalli akuerineqarnissaa suli amigaataavoq.

AAMMA ATUARUK Sisimiuniit Kangerlussuarmut aqqusinissap pilersaarusiornissaanut aningaasaliisoqartoq

Aqquserngup sananeqarnissaanut avatangiisinut sunniutigisinnaasai pillugit Pinngortitamut Avatangiisinullu Naalakkersuisoqarfiup akuersinissaa amigaataavoq. Naalakkersuisoqarfik qaammammi uani akuersissasoq Qeqqata Kommuniata neriuutigaa.

Aqqussiniornissamut 5 millionit koruunit aningaasaqarnermut inatsimmit siorna aningaasaliissutigineqarput, suliniutip pilersaarusiornissaa aallartinneqarniassammat. 

Qeqqata Kommunia aqqusinniornissamut 50 millionit koruuninik aningaasaliivoq.

Aqqusinniorneq 400-500 millionit koruunit akornanni akeqassangatinneqarpoq.