Qeqqata Kommuniani Siumut: Qinersisartut ersarissumik aalajangiinerat ataqqineqartariaqarpoq
- Qaammatit qulingiluat matuma siorna inatsisartunut qinersinermi qinersisartut allannguinissamik ersarissumik aalajangiinerat ataqqineqartariaqarpoq kiisalu qineqqusaarnermi inuiaqatigiinnut suliniutissatut pingaartutut qineqqusaarutineqartut politikkerinit pimoorullugit sulissutigeqqullugit kaammattuutigissavarput, ullumikkut immikkut ittumik ataatsimeersuarnissamik piumasaqarnermut kiisalu immikkut ittumik qinersititseqqinnissamut nukiit atorneqartariaqanngillat, inuiaqatigiinni suliassat pingaartullit pillugit ataatsimoorluta sulisariaqarpugut, inuiaqatigiinni avissaartuutsitsiniarsarinermut nukigut pisinnaasagullu atornagit, Ejnar Lundblad, Siumut Sisimiut, aamma John Olsen, Siumut Maniitsoq, ataatsimoorlutik oqaaseqaateqarlutik taama allapput.
Inuiaqatigiinni ataatsimoorluta suliassarpassuaqarpugut, inuiaqatigiinni suliassat pissaaneqarniuunnermik ingerlatsinermut atorneqartariaqanngillat, Siumup immikkoortortaaneersut isumaqarput.
Hans Enoksenip partiitsinnut ilaasortaajunnaarnera inuttut aalajangernerimmagu ataqqivarput, tamannali uniffiginagu ingerlaqqissaagut. Siumukkormioqatigullu partiinilu allani politikerit kaammattorusuppagut maanna pisut uniffiginagit politikkikkut suliat ingerlateqqullugit.
- Naggataatigullu kaammattuutigissavarput Inatsisartuni politikkikkullu sulinermi amerlanerussuteqartut aalajangerneri ataqqineqartariaqartut, ikinnerussuteqarneq ikinnerussuteqarneruvoq taamaattumillu amerlanerussuteqartut amerlanerussuteqarnertik tunngavigalugu apeqqutini pingaaruteqartuni aalajangersimaneri aamma ataqqineqartariaqarput, Qeqqata Kommuniani Siumup immikkoortortaqarfianeersut naggasiillutik taama allapput.
