Qeqqata Kommuniani piiaaviliornissaq akuersissutigineqartoq
Peqatigisaanik Naalakkersuisut IBA-mut isumaqatigiissut Namminersorlutik Oqartussat, Qeqqata Kommuniata aamma Hudsonip akornanni isumaqatigiissutigineqartoq akuersissuteqarfigaat.
Sumiiffimmi Naajanik taaneqartartumi 96 km2-isut annertussuseqartumi, Sisimiut aamma Kangerlussuup akornanni Qeqqata Kommuniani Qaqortorsuup eqqaani inissisimasumi aatsitassamik anorthositimik piiaanissamik qinnuteqaammik Hudson Greenland A/S 2015-imi marsimi tunniussivoq.
AAMMA ATUARUK Qaammatip ujarai Kangerlussuup qinnguaneersut Europaliaassorneqarsinnaasut
- Hudsonip suliassaa kalaallit oqartussaasuisa, ilanngullugit Qeqqata Kommunia aamma aatsitassanut oqartussaasoq, aatsitassarsiornermik suliaqartunik sunniuteqarluartumik suleqateqarsinnaanerannut aammalu ataatsimoorluni aaqqiissutissarsisoqarsinnaaneranut, assersuutissaalluarpoq, Aatsitassanut Naalakkersusuisoq tusagassiorfinnut nalunaarummi ilaatigut taama oqarpoq,
- Suleqatigiinnermut pitsaasumut sunniuteqarluartumullu tunngavissarititaasoq tassaasimavoq qinnuteqaammut killissaliussat ersarissuussasut paasiuminartuussasullu. Taamatuttaaq Hudsonip soorunami nammineq suliassani suliarilluarsimavai aammalu inuiaqatigiit piumasaqaatai naammassisimallugit, Aningaasaqarnermut Aatsitassanullu Naalakkersuisoq Andreas Uldum taama oqarpoq.
Sanaartornermi nunaqavissut sulisorineqassapput
Sanaartornermut immikkoortumi, ukiup ataatsip missaanik sivisussuseqartussatut naatsorsuutigineqartumi, inuit 20-it sulisussatut pisariaqartinneqassasut naatsorsuutigineqarpoq, taakkua affaasa missaat nunaqavissuussallutik.
Ingerlatsinermut immikkoortumi ukiuni 20-ini aatsitassarsiorfiup maannamuugallartoq ingerlanneqarfissaatut pilersaarusiorfiusuni sulisussat 60-it missaat sulisussatut pisariaqartinneqassasut naatsorsuutigineqartoq, Naalakkersuisut tusagassiorfinnut nalunaaruteqarlutik taama allapput.