Qaammatip ujarai Kangerlussuup qinnguaneersut Europaliaassorneqarsinnaasut

Anorthosit ujaqqat ilagivaat, aamma qaammammi nassaarineqarsimasoq, taamaattumillu månestenimik/qaammatip ujaraanik taaneqartarluni. Qaammatip ujaraa aserorterneqaraangami sioranngortarpoq qaqortoq, glasfiberiliornermut atussallugu naleqquttorujussuaq.

Canadamiut ingerlatseqatigiiffiat atuagassiamut Søfartimut nalunaarpoq europamiumik qaammatip ujaraanik ukiuni qulini ukiumut 150.000 tonsinik  pisiortornissamut soqutiginnittumik nassaarsimalluni.

Ingerlatseqatigiiffik Hudson Resources Vancouverimi angerlarsimaffeqarpoq, tassani pisortaanerup tullia Jim Cambon aligoqqinnik nassaaratik qaammatip ujaraanik nassaaramik pakatsinngilaq.

Glasfiberiliornermi ilaatigut atorneqarsinnaasoq

- Atortussiaq pitsassuuvoq. Aatsikkuminartuugami assersuutigalugu glasfiberiliornermi aningaasartuutinik appartitsisinnaavoq, taamaalilluni ikummatissanut aningaasartuutit 20 procentimik appartissinnaallugit, Jim Cambon oqarpoq.

Taassuma naatsorsuutigaa qaammatip ujaraanik tunisassiorneq ukiualuit ingerlaneranni 200.000 tonsiniit 500.000 tonsinut qaffakkumaartoq.

Piiaaffissaq Kangerlussuarmi qinngorpasissumiippoq, Hudson Resourcesillu pilersaarutigaa nassiussuivimmik quersuaaraliussalluni, piiaavimmiillu kangerluup tungaanut aqqusineq pioreersoq 10 kilometerisut isorartutigisoq assartuinermut atussallugu.

Atuagassiaq Søfart naapertorlugu akuersissutissat naammassineqariarpata sanaartornissaq qaammatip tulliani aallarteriissasoq.