Qeqqata Kommuniani atuilluartuunissamut suliniutinut 55.000 kr.-inik aningaasaliisoqartoq
Suliniuteqartut tassaapput John Olsen Maniitsoq Extrem Sportimeersoq, SAK-p meerartai aamma Laasi Kristiansen Sisimiuneersoq. Olsen pisuttuartarfiit allagartalersornissaannut 25.000 koruuninik aningaasaliiffigineqarpoq, SAK timersorneq, nerisaqarneq peqqinnartumillu inuusaaseqarneq pillugu meeqqanut inuusuttunullu isumasioqatigiittoqarnissamut 17.500 koruuninik tunineqarpoq Laasi Kristiansenilu munaqarfinni Itillimi Sarfannguanilu naasunut naatsiiviliornissamut suliniutissamut 15.000 koruuninik tunineqarluni.
Aningaasanik tapiissuteqarnerup saniatigut kommunalbestyrelsip aalajangerpaa, angakkuarnermik aliikkusersuisartoq Karsten Damm, nunaqarfinni Sarfannguani Itillimilu meeqqanut angakkuarnermik takutitsinissaminik, kiisalu suleqatigiititserusunnerminik kissaateqartoq, kommunimi ingerlassinermi peqataanissaanut periarfissinneqassasoq.
- Atuilluartuunissamut aningaasaliissutit innutaasut ilisimanerujartorpaat aningaasaliissutissanillu qinnuteqartartut amerligaluttuinnarnerat nuannerpoq. Naak tamanut aningaasaliissutissanik tunioraasinnaanngikkaluarluta, neriuutigaarput inuit atuilluartuunissamut aningaasaliissutinik tunineqarnikuunngikkaluarlutik, suliniutiminnut piviusunngortitsinissaminnut kommuni kajumissaarisooqataassasoq, aamma kommunip avataatigut, Qeqqata Kommuniani borgmesteri Hermann oqarpoq.