Qeqqata Kommuniani atuilluartuunissamut aningaasaliissutinik sisamassaanik agguaassisoqarpoq
Pilersaarutinit ilaatigut Peqatigiiffik Neriusaaq pujoorivimmik, aalisakkanut panertitsivimmik kiisalu Maniitsup eqqaani utoqqaat illuarassaannik pilersitsinissaminnik kissaateqartoq aningaasaliiffigineqarpoq.
Tamatuma saniatigut Agneta Geisler aamma Øjvind Schwedler, sikkilinik assartuutinik assersuutigalugu innuttaasut pisiaminnik assartuinissaannut akeqanngitsumik attartortitserusullutik pilersaaruteqarnerinut aningaasaliiffigineqarput.
Urban Greenland (Sisimiuni sikkilertarfimmi ammalortumik sikkilertarfiliornikut) aaqqissugaanik, skaterneq pillugu Sisimiuni niviarsiaqqanut aaqqissuussinissamut aamma aningaasaliiffigineqarput.
Kingullertut minnerunngitsumillu Lea aamma Vittus Poulsen, Atammimmi silami timigissaatissanik pisinissaannut aningaasaliiffigineqarput.
Innuttaasut, peqatigiiffiit kattuffiillu kajumissutsiminnik suliaqarnermikkut inuiaqatigiit atuilluartuulernerunissaannut taperseerusuttut tapersernissai, atuilluartuunissamut aningaasaliilluni agguaassisarnerup siunertaraa.