Qeqqata Kommuniani atuilluartuuneq oqallisiginiaraat
Innuttaasunik peqataatitsiniarneq innuttaasut ataatsimiissinneqartaannarnissaannik pinnani aamma allatut anguniarneqarput.
Bussi aqqusinertigut ingerlaartinneqassaaq, siullermik novembarip 28-anni. Bussi angalaartussaq taaneqarpoq, 'Bussi oqalliffik', ingerlaarnerminilu innuttaasut, suliffeqarfiit meeqqeriveqarfiillu oqaloqatigiinnissaannut aggersarneqassallutik. Bussimi ilaassapput, politikerit atorfillillu ulluinnarni atuilluartuunissamik suliaqartut.
Qeqqata Kommuneani innuttaasut peqataatilernissaat, borgmester Hermann Berthelsenip qilanaaraa.
- Qeqqata Kommuneani atuilluartuunissamik suliaqarnermik ingerlatarput, avatangiisiinnarnut tunngasuinnaanngilaq. 2020-mi kommunip atuilluartuunissaa kissaatigigatsigu, taava isumaginninnermik ilinniartitaanermillu siammasissumik nukittorsaasumillu eqqarsartariaqarpugut. Taamaattumik suliniuterput pillugu innuttaasunik oqaloqatiginninnissatsinnik aggersaanissarput pingaaruteqarpoq, Hermann Berthelsen oqarpoq.
Bussi atorlugu oqallittarnissap siunertaraa, innuttaasut qanimut tikillugit pisarnissaq, Ilaqutariinnermut ataatsimiititaliami siulittaasup tullia, Alfred Olsen oqarpoq, nangillunilu.
- Illoqarfik tamaat bussimik angalaviginiarparput, atuarfiit, pisiniarfiit inissiaqarfiillu eqqaat iniffigisarlutigu. Suliniuterput innuttaasunit qanoq tiguneqassanersut tusassallugu qilanaaraarput aamma innuttaasut inuit atugarisaasa pitsanngortinneqarnissaannik qanoq isumaqarnersut tusarnissaat qilanaaralutigu, Alfred Olsen oqarpoq.
Suliniut 32-nik immikkoortoqarpoq, ilaatigut ilinniartitaanermut, inuit atugarisaannik avatangiisillu pillugit ilisimasaqarnerulernissaq siuliniutigineqassallutik.
