Qeqqata Kommunia: Kangerlussuarmi efterskoliugallartoq piukkunnarnerpaavoq

Qeqqata Kommuniani borgmesteri taama isumaqarpoq. Taamaammat Kangerlussuarmi Efteskoliugallartup aasaru matunissaanik Naalakkersuisut nalunaaruteqarnerat Hermann Berthelsenip ajuusaarutigilluinnarlugulu paasinngilluinnarpaa.

- Kangerlussuup inissisimanerata inuusuttuaqqanut soqutiginarsinnaassusia allisippaa, assersuutigalugulu nunanut allanut angalaniaraanni periarfissat qanittut, aamma nunap atornissaanut periarfissat qanittut. Minnerunngitsumillu allaninngaanniit tikeraartoqarniaraanni periarfissat pitsaasorujussuit. Kangerlussuup efterskoleqarfissatut piukkunnaatai Qeqqata Kommuniani borgmesterip Hermann Berthelsenip taama tulleriiaarpai.

Inatsisartut aningaasanut inatsit ukiaq novembarip 27-ani akuersissutigimmassuk, Kangerlussuarmi Efterskoliugallartoq ilaanngilaq.

Hermann Berthelsenip erseqqissarpaa, aningaasanut inatsisip akuerineqannginnerani, efterskolip ingerlaqqiinnarnissaanut kommunertik sorsussimagaluartoq.

Kisianni toqqissisimanartumik pissarsiaqarfiusumillu ilinniartitsinissamut pitsaasumik atugassaqartitsiniarneq ajornakusoorsimaqisoq, Naalakkersuisut matusinissamik ippassaq nalunaruteqarnerminni ilaatigut tunngavilersuipput. Tassalu atuartitsiffiusartut najugaqarfiillu ilaatigut atuartunut sulisunulluuniit pitsaanerpaasimangillat.

- Naalakkersuisunukua namminneq atuarfittut atorsinnaasunngorlugu taamatut iluarsaatitaat. Naalakkersuisunit aamma aningaasarpassuit tassunga atorneqareerput.

Nakorsiarniartut, kigutit nakorsaaliartussat assigisaannilluunniit pisariaqartitsisut Nuuliartariaqartartut, Naalakkersuisoqarfimmit ullumi oqaatigineqarpoq.

Tamannalu ilumoortoq Hermann Berthelsenip nassuerutigaa:

- Taamatut oqarniarutta, assersuutigalugu nunaqarfippassuarni massakkut nakorsaqanngilaq. Nunaqarfinni inuppassuarnut assigiinngitsorpassuarnik soqanngilaq. Kangerlussuarli nunaqarfinniittuulluni nakorsiarnissamut periarfiginnerpaanut ilaavoq, nalunaaquttap akunnerata affaa qaangiutinngitsoq nakorsaqarfimmut apuuttoqarsinnaagami, Hermann Berthelsen oqarpoq.