Qeqqata Akademi ApS akiliisinnaajunnaartoq

Inatsisit naapertorlugit paasissutisssiivimmi Statstidende.dk-mi Qeqqata Akademip akiliisinnaajunnaarneranik nalunaarut takuneqarsinnaavoq.

Tassanilu eqqartuussissuserisoq Niels Hansen Damm, Malling Hansen Dammimeersoq, akiliisinnaajunnaartup pigisaanik nakkutiginnittussatut Nunatsinni Eqqartuussivimmit toqqarneqarpoq.

Qeqqata Akademi aamma Qeqqata Kommunia Sisimiuni Piareersarfiup suliaanik ingerlatsissallutik sullissinissamik 2014-imiilli isumaqatigiissuteqarput.

Sullissinissamut isumaqatigiissut aqqutit assigiinngitsut ujarlerfigineranni, IMAK-ip nittartagaanut ikkussaq takuarput, isumaqatigiissutigineqarpoq ukiumut 5,3 millionit koruuninik Qeqqata Kommunianit aningaasaliiffigineqassasut. Isumaqatigiissuteqarnermi 2016-imi nutaamik isumaqatigiissusiortoqartussaavoq.

Atuarneqarsinnaavortaaq taamani Piareersarfiup maanna Majoriap illutaa aamma pigisai akeqanngitsumik atorsinnaagaat, ingerlatsinerli isumagissagaat.

Qeqqata Akademip ukiumoortumik nalunaarusiaanni marluusuni atuarneqarsinnaavoq, suliffeqarfiup aallartinneraniilli akiitsoqalersimasoq nassuiarneqanngitsunik.

Aqutsisuniillu nassuianeqanngillat akiitsoqalernermi aningaasat sumut atorneqarnersut, kikkut akiitsunut qularnaveeqqusiisuunersut imaluunniit nammineq aningaasaatit minuseqqasut ukiuni tulliuttussani qanoq aaqqinneqarnissaannut pilersaaruteqarnerlutik oqaaseqanngillat.

Akademimi aqutsisumut Lars Møller Sørensenimut qulaani pineqartut nassuiaqqullugit attaveqarfigigatsinni imatut taamaallaat akissutissaqarpoq.

- Qeqqata Akademi akiliisinnaajunnaarniariartoq Qeqqata Kommuniata Majoriaq ingerlatilerpaa, majoriamilu ilinniartut ukiumi nutaami atuarnertik aallarteqqiinnassavaat

Qeqqata Kommuniata sullissinissamik isumaqatigiissummik taamaatitsinerat ilanngutassiami tulliani sammissavarput.

Qanorooq ataasinngornermi nalunaaqutaq 19.00 aallakaatinneqarpat allanik paasisaqarsinnaavutit.